ජාතික කම්කරු ආයතනයේ වෘත්තීය සමිතියට අයත් දෙහිවල ප්‍රදේශයේ දෙමහල් ගොඩනැඟිල්ලක් බදු දීමට වෙළෙඳ ඇමැති වසන්ත සමරසිංහ ව්‍යාජ ඔප්පුවක් භාවිත කළැයි කියන සිද්ධිය සම්බන්ධයෙන් විමර්ශනය කර සම්පූර්ණ වාර්තාවක් ලබාදෙන ලෙස ගල්කිස්ස මහේස්ත්‍රාත් නිලුපුලි ලංකාපුර කොළඹ වංචා විමර්ශන කාර්යාංශයට (FIB) නියෝග කර තිබේ.

වර්තමාන කම්කරු නියෝජ්‍ය ඇමැතිවරයා ලෙස කටයුතු කරන ලංකා ගුරු සේවා සංගමයේ ප්‍රධාන ලේකම් මහින්ද ජයසිංහට එම දේපළ වංචනික ලෙස බදු දී ඇති බවට ඇමැති සමරසිංහට චෝදනා එල්ල වේ.

විමර්ශනය නීතිපතිවරයා වෙත යොමු කරන ලෙස වංචා විමර්ශන කාර්යාංශය කළ ඉල්ලීමට කිසල් සේනානායක සමඟ අගතියට පත් පාර්ශ්වය වෙනුවෙන් පෙනී සිටි ජනාධිපති නීතිඥ මෛත්‍රී ගුණරත්න ඉදිරිපත් කළ විරෝධතා සළකා බැලීමෙන් අනතුරුව මහේස්ත්‍රාත්වරයා මෙම නියෝගය කළේය.

අදාළ දේපළ දෙහිවල ප්‍රදේශයේ පිහිටා ඇති බවත් එය ව්‍යාජ ඔප්පුවක් යොදා රුපියල් ලක්ෂ 36කට බදු දී ඇති බවත් ගුණරත්න අවධාරණය කළේය.

වංචා විමර්ශන කාර්යාංශය තර්ක කළේ දේපළ අයිතිය සම්බන්ධයෙන් පැහැදිලිකමක් නොමැති බවත් මේ සඳහා වැඩිදුර විමර්ශනයක් අවශ්‍ය බවත්ය.

ජාතික කම්කරු ආයතනයේ නිලධාරී මණ්ඩලය වරින් වර වෙනස් වී ඇති බවත් මේ නිසා විමර්ශනය නීතිපතිවරයා වෙත යොමු කළ යුතු බවත් එහි සඳහන් විය.

කෙසේවෙතත්, විමර්ශනය අවසන් වීමට පෙර නීතිපතිවරයා වෙත යොමු කිරීමට කිසිදු පියවරක් ගැනීමට එරෙහිව තර්ක කළ ගුණරත්න වැඩිදුරටත් පෙන්වා දුන්නේ පොලිසිය විසින් අධිකරණයට ඉදිරිපත් කරන ලද බී වාර්තාවෙන් සිද්ධියට සම්බන්ධ අය සනාථ වන බවයි.

ඔහු අධිකරණයෙන් ඉල්ලා සිටියේ මේ සම්බන්ධයෙන් පූර්ණ පරීක්ෂණයක් පවත්වන ලෙසට නියෝග කරන ලෙසයි.

කරුණු සළකා බැලූ මහේස්ත්‍රාත්වරයා මේ සම්බන්ධයෙන් පුළුල් පරීක්ෂණයක් පවත්වා වාර්තාවක් පෙබරවාරි 21 වැනිදා අධිකරණයට ඉදිරිපත් කරන ලෙස පොලිසියට නියෝග කළේය.