සන්ඩේ ලීඩර් පුවත්පතේ කර්තෘ ලසන්ත වික්‍රමතුංග ඝාතන සිද්ධියේ සැකකරුවන් තිදෙනෙකු නිදහස් කරන ලෙස 2025 ජනවාරි මස 27 වන දින නීතිපතිවරයා විසින් අපරාධ පරීක්ෂණ දෙපාර්තමේන්තුවට නිකුත්කර තිබූ නියෝගය තාවකාලිකව අත්හිටුවන බව නීතිපතිවරයා අද (13) ලිඛිතව ගල්කිස්ස මහෙස්ත්‍රාත් අධිකරණයට දැනුම්දී තිබේ.

නීතිපතිවරයා විසින් අදාළ නඩුවේ සැකකරුවන් තිදෙනකු සම්බන්ධයෙන් තවදුරටත් නීතිමය පියවර නොගන්න බව දන්වමින් පසුගිය 2ජනවාරි 7 වැනිදා මෙම ලිපිය අපරාධ පරීක්ෂණ දෙපාර්තමේන්තුවට යොමුකර තිබිණි.

කෙසේවෙතත් අපරාධ පරීක්ෂණ දෙපාර්තමේන්තුව විසින් පෙබරවාරි 11 වැනිදා මෙම ලිපිය සම්බන්ධයෙන් තිබුණු අතර, එදිනම නීතිපති දෙපාර්තමේන්තුව දැනුම්දී තිබුණේ, අදාළ ලිපිය අනුව කටයුතු කිරීමේ නිර්දේශය තාවකාලිකව අත්හිටුවන බවටය.

ගල්කිස්ස මහෙස්ත්‍රාත් අධිකරණයට දැනුම්දුන් මෙම කරුණු සළකා බැලීමෙන් අනතුරුව මහේස්ත්‍රාත් චතුරිකා සිල්වා මෙම නඩුව මැයි මස 30 වැනිදා යළි කැඳවීමට නියම කළාය.