January 3, 2025
අචලා සෙනෙවිරත්න නමැති නීතීඥවරියක් අද අපරාධ පරීක්ෂණ දෙපාර්තමේන්තුවට පැමිණ පෞද්ගලික පැමිණිල්ලක් ඉදිරිපත් කර තිබිණි.
අනතුරුව ජනමාධ්‍ය හමුවේ අදහස් දක්වමින් ඇය පැවසුවේ තමන් ඉදිරිපත් කළේ පෞද්ගලික පැමිණිල්ලක් වුව ද එම පැමිණිල්ල තුළින් මෙරට ජනතාවට සිදුවන අනර්ථයන් සහ පීඩාවන් සම්බන්ධයෙන් විමර්ශනයේදී පැහැදිළිව අනාවරණ වනු ඇති බවයි.
සිය පැමිණිල්ලට පාදක වන වග උත්තරකරු වන්නේ යුද හමුදාව බවත්, යුද හමුදාව ඇතුළුව ත්‍රිවිධ හමුදාව සම්බන්ධව සිටින ඇතැම් දූෂිත පුද්ගලයන් විසින් සිදුකරනු ලැබූ අතුරුදන් කිරීම් ඇතුළු සිදුවීම්වලට මුහුණදුන් වින්දිතයින් වෙනුවෙන් තමන් දිගින් දිගටම පෙනීසිටි බවත්, තමන් එහිදී යුද, නාවික හෝ ගුවන් හමුදාව පොදු අධිකාරියක් ලෙස ඉලක්ක නොකළ බවත්, තමන් එළිදරව් කළේ ඒවායේ සිටි දූෂිතයින්ගේ දූෂිත ක්‍රියාමාර්ග බවත් එම නීතීඥවරිය ජනමාධ්‍ය වෙත පැවසුවාය.
2007 වසරේ සිට තමන් එවැනි වින්දිතයන් වෙනුවෙන් අධිකරණයේ පෙනීසිටි බවත්, එම කාලය තුළදී තමන්ට දැඩි පීඩාවන්ට මුහුණදීමට සිදුවූ බවත් එය සුදු වෑන් ක්‍රියාත්මක කල කාලයක් බවත් ඇය පැවසුවාය.
එම කාලය තුළදී තමන්ට විවිධ තර්ජනයන්ට මුහුණදීමට සිදුවූ බවත්, තමන් ඒ සම්බන්ධයෙන් විවිධ ස්ථානවලට තමන් පැමිණිලි ඉදිරිපත් කළ ද ඒවායෙන් තමන්ට යුක්තිය ඉටුනොවුණු බව ද ඇය පෙන්වා දුන්නාය.
කෙසේවෙතත් තමන් අද සිදුකළ පැමිණිල්ලේ වග උත්තරකරුවන් ලෙස ජනරාල් ශවේන්ද්‍ර සිල්වා ඇතුළු හිටපු හමුදාපතිවරුන් දෙදෙනෙකු සහ හමුදාවේ තවත් ඉහළ නිලධාරීන් කිහිපදෙනෙකු සිටින බව ද ඇය පැවසුවාය.
ඇය වැඩිදුරටත් සදහන් කළේ හමුදා බුද්ධි අංශ විසින් තමාව ත්‍රස්තවාදියකු ලෙස සටහන් කරමින් වාර්තා සම්පාදනය කර ඇති බවත් , එම වාර්තා රහසිගතව පවත්වාගෙන ගොස් ඇති බවත් ය.
