මූල්‍ය අපරාධ විමර්ශන කොට්ඨාසයේ හිටපු ප්‍රධානී විශ්‍රාමික නියෝජ්‍ය පොලිස්පති රවි වෛද්‍යලංකාර ක්‍රිෂ් සමාගමින් අල්ලස් ලබාගෙන ඇති බව සඳහන් කර, ඒ පිළිබඳ විධිමත් පරීක්ෂණයක් සිදුකරන ලෙස ඉල්ලා දූෂණ විරෝධී හඬ සංවිධානයේ කැඳවුම්කරු වසන්ත සමරසිංහ පෙරේදා (20) අල්ලස් හෝ දූෂණ චෝදනා විමර්ශන කොමිෂන් සභාව වෙත පැමිණිල්ලක් ඉදිරිපත් කර ඇත.

ඊට අදාළ ලිපි ලේඛන සහිතව මෙම පැමිණිල්ල ඉදිරිපත් කර ඇති අතර, අල්ලස් පනතේ විධිවිධාන යටතට ගැනෙන විෂමාචාරයන් සිදුකර ඇති බව එහි දැක්වේ.

2015 දෙසැම්බර් මස 26 වැනිදා දූෂණ විරෝධී හඬ සංවිධානය ක්‍රිෂ් සමාගමට එරෙහිව අල්ලස් කොමිසමට පැමිණිල්ලක් කර තිබේ.

ඊට අදාළව අධිකරණ කටයුතු සිදු කරමින් තිබියදී එවකට මූල්‍ය අපරාධ විමර්ශන කොට්ඨාසයේ ප්‍රධානියා ලෙස කටයුතු කළ රවි වෛද්‍යලංකාර නියෝජ්‍ය පොලිස්පතිවරයා තම කොට්ඨාසය ක්‍රිෂ් ට්‍රාන්ස්වර්ක්ස් පෞද්ගලික සමාගමට අදාළව නීතිමය ක්‍රියාමාර්ග අනුගමනය නොකරන බවත්, එකී සමාගම වරදක් හෝ වංචානික ක්‍රියාවක් සිදුකර ඇති බව හෙළිවී නොමැති බවත්, 2016 ජුලි 12 වැනිදා ලිපියක් මගින් කියා ඇතැයි පැමිණිල්ලේ සඳහන් කර ඇත.

අදාළ සමාගම වරදක් කර නොමැති බව ඔහු පවසා ඇත්තේ මූල්‍ය අපරාධ කොට්ඨාසයේ ඒකක හත ස්ථානාධිපතිවරයා ක්‍රිෂ් සමාගමේ පරිගණක යන්ත්‍ර පරීක්ෂණයට භාජන කළ යුතු බවට අධිකරණයට කරුණු වාර්තා කර තිබියදී බව ද එහි දක්වා තිබේ.

අධිකරණ කටයුතු සිදුවෙමින් පවතින අවස්ථාවක රවී වෛද්‍යලංකාර එම සමාගම චෝදනාවලින් නිදොස් කොට ලිපියක් නිකුත් කර ඇත්තේ අදාළ සමාගමෙන් අල්ලස් ලබාගැනීම මත බව වසන්ත සමරසිංහ යොමු කළ ලිපියේ සඳහන් කර ඇත.

එලෙස ලිපි යොමු කළ හිටපු ප්‍රධානියා පසුගිය 2022 වසරේ දෙසැම්බර් මස 28 වැනිදා ක්‍රිෂ් සමාගමේ නව අධ්‍යක්ෂවරයකු ලෙස පත්වීම් ලබා ඇති බවත්, එම පත්වීම ඔහු සහ සමාගම අතර පවතින සම්බන්ධතාවන්හි ප්‍රතිඵල බවත්, මෙම ලිපියේ දක්වා තිබේ.

එබැවින් මෙම වංචනික ක්‍රියාව පිළිබඳව විධිමත් පරීක්ෂණයක් සිදු කරන ලෙස ද අල්ලස් හෝ දූෂණ චෝදනා විමර්ශන කොමිෂන් සභාව වෙත දූෂණ විරෝධී හඬ සංවිධානය ඉදිරිපත් කළ පැමිණිල්ලේ වැඩිදුරටත් සඳහන් කර ඇත.(දිවයින)