April 6, 2025
2025 පළාත් පාලන මැතිවරණයේ නිල ප්‍රතිඵල නිකුත් කිරීම සඳහා මාධ්‍ය ආයතනවලින් අය කරන ගාස්තු ඉහළ දැමීමට මැතිවරණ කොමිසම තීරණය කිරීමෙන් පසු මැතිවරණ කොමිසම සහ ශ්‍රී ලංකා විද්‍යුත් විකාශකයන්ගේ සංසදය අතර ගැටුමක් ඇති වී තිබේ.
නව ගාස්තු ව්‍යුහයට අනුව, නිල වශයෙන් මැතිවරණ ප්‍රතිඵල නිකුත් කළ වහාම ප්‍රචාරය කිරීමට අවශ්‍ය නම් තනි මාධ්‍ය ආයතනයකට රුපියල් මිලියන 8ක් ගෙවිය යුතු අතර, තනි මාධ්‍ය ආයතනයකට අයත් නාලිකා සඳහා රුපියල් මිලියන 15ක පැකේජ ගාස්තුවක් පිරිනමනු ලැබේ.
මැතිවරණ කොමිසම විසින් ප්‍රතිඵල නිකුත් කළ වහාම පළ කරනු ලබන පුවත්පත් වෙබ් අඩවි ඇතුළු සියලුම විද්‍යුත් සහ ඩිජිටල් මාධ්‍ය සඳහා මෙම ගාස්තු වැඩිවීම අදාළ වේ.
කෙසේවෙතත්, මැතිවරණ කොමිසමේ ගාස්තු වැඩිවීම ගැන විද්‍යුත් විකාශකයන්ගේ සංසදය පවසන්නේ නව අනුපාත පෙර මැතිවරණ සඳහා අය කළ මුදලට වඩා සියයට 1300කින් වැඩි බැවින් බොහෝ මාධ්‍ය ආයතන ප්‍රතිඵල විකාශන අයිතිය ලබා ගැනීමෙන් ඉවත්වීමට හේතු විය හැකි බවයි.
“මේවා වාණිජ අන්තර්ගතයන් සඳහා එක් නාලිකාවකට ලබා දෙන සුවිශේෂී ආවරණය සඳහා අය කරන ගාස්තුයි, නමුත් මැතිවරණ විකාශනය සෑම කෙනෙකුම කරන දෙයක්,” යනුවෙන් විද්‍යුත් විකාශකයන්ගේ සංසදයේ සභාපති අසංග ජයසූරිය පවසයි.
මැතිවරණ ප්‍රතිඵල විකාශනය කිරීම ද මහජනතාවගේ තොරතුරු දැන ගැනීමේ අයිතිය තහවුරු කිරීමක් වන අතර, මාධ්‍ය ආයතන ප්‍රතිඵල විකාශනය කිරීමෙන් ඉවත් වුවහොත් එම අයිතියට බරපතළ පහරක් එල්ල වනු ඇතැයි ඔහු තවදුරටත් පැවසීය.
කෙසේවෙතත්, මැතිවරණ කොමසාරිස් ජනරාල් සමන් ශ්‍රී රත්නායක මෙම පියවර ආරක්ෂා කරමින් පවසන්නේ සංශෝධිත අනුපාත මහා භාණ්ඩාගාරය සහ අනෙකුත් රජයේ ආයතන සමඟ සාකච්ඡා කිරීමෙන් පසු කමිටුවක් විසින් තීරණය කර ඇති බවයි.
“මෙම අනුපාත පිළිබඳ අපි මාධ්‍ය ආයතනවලට දැනුම් දුන්නා, නමුත් ඒවා තවමත් අවසන් කර නැහැ. ඒ නිසා අපි මාධ්‍ය ආයතනවලින් තමන්ගේම නිර්දේශ ඉදිරිපත් කරන ලෙස ඉල්ලා සිටියා. අපි නිර්දේශ භාණ්ඩාගාරයට ඉදිරිපත් කරනවා. මෙම අනුපාත අපට තනිවම වෙනස් කරන්න බැහැ. අපට භාණ්ඩාගාරයෙන් අනුමැතිය අවශ්‍යයි.” යනුවෙන් ඔහු පැවසීය.
ගාස්තු වැඩිවීම සම්බන්ධයෙන් ඔහු කියා සිටියේ මැතිවරණ කොමිසම වහාම මාධ්‍ය වෙත ප්‍රතිඵල නිකුත් කිරීම සඳහා රුපියල් බිලියනයක් දක්වා වැය කරන බවයි.
කොමිසම කළ යුතුව ඇත්තේ ප්‍රතිඵල රජයේ ප්‍රවෘත්ති දෙපාර්තමේන්තුවට ෆැක්ස් කිරීම පමණක් බවත්, එමඟින් ඒවා මාධ්‍ය ආයතන වෙත බෙදා හරිය හැකි බවත් ඔහු පෙන්වා දී තිබේ.
මාධ්‍ය ආයතන, විශේෂයෙන් රූපවාහිනී නාලිකා, මැතිවරණ කාලවලදී වෙළඳ දැන්වීම් ආදායමෙන් දැවැන්ත ලාභ උපයන බව ද ඔහු කියා සිටියේය.
“මැතිවරණ කාලවලදී ඔවුන්ගේ වෙළඳ දැන්වීම් අනුපාත කාඩ්පත් වෙනත් කාලවලදී අනුපාත සමඟ සංසන්දනය කිරීමේදී මෙය ඔබටම දැක ගන්න පුළුවන්. මෙම නව අනුපාත සමඟ වුවත් ප්‍රතිඵල නිකුත් කිරීම සඳහා අප වැය කරන අරමුදල්වලින් අපට ආපසු ලබා ගත හැකි වන්නේ සියයට 10-15ක් පමණයි ,” යැයි ඔහු තවදුරටත් පැවසීය.
කෙසේවෙතත්, ශ්‍රී ලංකා විද්‍යුත් විකාශකයන්ගේ සංසදය පවසන්නේ රූපවාහිනී නාලිකා සඳහා ලාභයෙන් වැඩි ප්‍රමාණයක් ලැබෙන්නේ මැතිවරණ ප්‍රතිඵල විකාශනය කිරීමෙන් නොවන අතර මැතිවරණ නීති උල්ලංඝනයන් ඉස්මතු කිරීමට අමතරව, මැතිවරණ සහ ඒ ආශ්‍රිත කරුණු පිළිබඳ ඡන්දදායකයන් අතර දැනුවත්භාවය ඇති කිරීමෙන් මාධ්‍ය ආයතන මැතිවරණ ක්‍රියාවලියේ සාර්ථකත්වයට විශාල වශයෙන් දායක වන බවයි.
