ශ්‍රී ලංකාවේ අවසාන රජු වන ශ්‍රී වික්‍රම රාජසිංහගේ සොහොන දකුණු ඉන්දියාවේ තමිල්නාඩු ප්‍රාන්තයේ වෙල්ලෝර් හි පිහිටා ඇති බවත්, ඔහුගේ පරම්පරාව ඔහුව අනුස්මරණය කරන බවත් ඉතිහාසය හදාරන සිසුහු දනිති.

මධුර නායක් රාජවංශයෙන් පැවත එන ශ්‍රී වික්‍රම රාජසිංහ රජුගේ 193 වැනි අනුස්මරණ උත්සවය බ්‍රහස්පතින්දා (ජනවාරි 30) දින රජුගේ සොහොන ඉදිකරන ලද මුතු මණ්ඩපම් හි දී පැවැත්විණි.

රජු 1832 ජනවාරි 30 වන දින තමිල්නාඩුවේ වෙල්ලෝර් කොටුවේදී මියගියේය.

රජුගේ මරණ සංවත්සරයේදී ඔහුගේ උරුමක්කාරයන් විසින් සෑම වසරකම ඔහුගේ සොහොනෙහි විශේෂ ආගමික පූජා පවත්වනු ලැබේ.

මෙම වසරේ ද තමිල්නාඩු, ආන්ද්‍ර ප්‍රදේශ් සහ කර්ණාටක ප්‍රදේශවල වෙසෙන රජුගේ පරම්පරාව වෙනුවෙන් අනුස්මරණ උත්සවය පවත්වන ලද බව උත්සව සම්බන්ධීකාරක සහ රජුගේ 7 වන උරුමක්කාරයා වන වී. අශෝක්රාජා පවසා ඇත.