කොළඹ මහ නගර සභාව යටතේ පවතින රජය සතු ඉඩම් 52 ක් සහ ක්‍රීඩා පිටි 26 ක් ආදායම් උත්පාදන ව්‍යාපාර ලෙස ප්‍රතිව්‍යුහගතකරණය කිරීම සහ ප්‍රතිසංස්කරණය කිරීම සඳහා රජය විසින් නිදහස් කිරීමට සැලසුම් කර ඇති බව කොළඹ මහ නගර සභාවේ ආරංචි මාර්ග අනාවරණය කරයි.

කොළඹ වරාය නගරයට සමගාමීව කොළඹ නගරය වාණිජ හා සංචාරක කේන්ද්‍රස්ථානයක් බවට පත්කිරීමේ සැලැස්මට අනුව 99 අවුරුදු බදු පදනම මත ප්‍රතිසංස්කරණය කිරීම සඳහා මෙම ඉඩම් සහ බිම් දැනටමත් හඳුනාගෙන ඇත.

කොළඹ නගරය නේවාසික දේපළ 106,068 ක්, වාණිජ දේපළ 35,604 ක්, රජයේ ඉඩම් සහ වත්කම් 10158 ක් සහ නිදහස් කරන ලද දේපල 3,671 කින් යුක්තය.

බදු සහ ලියාපදිංචි ගාස්තු හරහා තම ආදායම වැඩිකර ගැනීමේ වැඩසටහනක් ලෙස 2021 දී දියත් කරන ලද ක්‍රියාවලියකින් පසුව කොළඹ මහ නගර සභාව විසින් මුලින් වාර්තා නොකළ වත්කම් 67,000 කට වඩා ලියාපදිංචි කර ඇත.

දේපළ ලියාපදිංචි කිරීමේ ආදායම එක් වරක් ගෙවීමක් වන අතර එය දේපළ ප්‍රමාණය අනුව රුපියල් 3,000 සිට 5,000 දක්වා ගාස්තු අය කිරීමෙන් වසරකට රුපියල් මිලියන 100 ක් පමණ වන බව කොළඹ මහ නගර සභාවේ උසස් නිලධාරියෙක් ජනමාධ්‍ය වෙත පවසා ඇත.

ගොඩනැගිලි සැලසුම් ලබාගැනීමට, දේපළ විකිණීමට, පවුල් ආරවුල් විසඳීමට හෝ උකස් කිරීමට කොළඹ පදිංචිකරුවන් විශාල පිරිසක් නගර සභාවෙන් දේපළ අයිතිය ලියාපදිංචි කර ගත් බවද ඔහු වැඩිදුරටත් සදහන් කර තිබේ.

රුපියල් බිලියන 11 ක වාර්ෂික ආදායමෙන් සියයට 80 ක් පමණ කොළඹ නගරයේ නිවාස 120,000 කින් දේපළ තක්සේරු කුලී බද්දෙන් අයකර ගැනේ.

එහෙත් මහ නගර සභාව විසින් රුපියල් 100,000 කට වැඩි මුදලක් ගෙවිය යුතු ඉඩම් හිමිකරුවන් 5,000 ක් ගෙවීම පැහැර හැර ඇති බැවින් ආදායම ලෙස ලැබිය යුතු රුපියල් මිලියන 6,200 ක මුදලක් අය කර ගැනීමට කොළඹ මහ නගර සභාවට අපොහොසත් වී ගොස් තිබේ.

මෙම සන්දර්භය තුළ දේපල තක්සේරු කුලියට අමතරව නව අනුකරණය කරන ලද කුලී ආදායම් බද්දක් පැනවීමේ ක්‍රමවේදය නැවත ක්‍රියාත්මක වීම වළක්වා ගැනීම සඳහා සියලු කරුණු හොඳින් සලකා බලමින් සිටින බව භාණ්ඩාගාරයේ උසස් නිලධාරියෙක් පවසා ඇත.

මේ අතර, කොළඹ නගර සභාව සතු ක්‍රීඩා පිටි වසර 100කට අධික පැරණිතම ක්‍රීඩා සමාජවලට සින්නක්කර අයිතිය හෝ අවුරුදු 99ක බදු දීමනා ලබා දෙන ලෙස ජනාධිපති රනිල් වික්‍රමසිංහ අදාළ උසස් නිලධාරීන්ට උපදෙස් දී ඇතැයි සංචාරක, ඉඩම්, ක්‍රීඩා සහ යෞවන කටයුතු ඇමැති හරීන් ප්‍රනාන්දු ප්‍රකාශ කර තිබේ.