කොළඹ කොටුව මහේස්ත්‍රාත් කෝසල සේනාධීරගේ වැඩ තහනම් කිරීමට අධිකරණ සේවා කොමිෂන් සභාව පියවර ගෙන තිබේ.

කෝසල සේනාධීර ගල්කිස්ස මහේස්ත්‍රාත් ධූරය දැරූ සමයේ ගල්කිස්ස මහේස්ත්‍රාත් අධිකරණයට ලබාදී තිබූ විදුලි සැපයුමට නීතිවිරෝධී ලෙස ඔහුගේ නිල නිවසට ලබාගෙන ඇතැයි ලැබුණු පැමිණිල්ලකට අදාළව අධිකරණ සේවා කොමිසමේ විමර්ශනයක් අවසන් වීමෙන් පසුව මහේස්ත්‍රාත්වරයාගේ වැඩ තහනම් කිරීමට පියවර ගෙන ඇත.

පැමිණිල්ල සම්බන්ධයෙන් කළ මූලික විමර්ශනයේදී අධිකරණ සේවා කොමිසම සාක්ෂිකරුවන් 20 දෙනකුගෙන් සාක්ෂි සටහන් කරගෙන තිබිණි.

සාක්ෂිකරුවන් අතරට මහාධිකරණ විනිසුරුවරුන් දෙදෙනකු මෙන්ම ලංකා විදුලිබල මණ්ඩලයේ සහ ජාතික ජල සම්පාදන හා ජලාපවහන මණ්ඩලයේ නිලධාරීන්ද ඇතුළත් වේ.

කෝසල සේනාධීරගේ වැඩ තහනම් කිරීමෙන් පසු වහාම ක්‍රියාත්මක වන පරිදි කොළඹ කොටුවේ නව මහේස්ත්‍රාත්වරිය ලෙස නුගේගොඩ මහේස්ත්‍රාත් තනූජා ජයසිංහ පත්කර තිබේ.

මේ අතර තනූජා ජයසිංහ කොටුව මහේස්ත්‍රාත්වරිය ලෙස පත්වීමෙන් පසු ඇති වූ පුරප්පාඩුව සඳහා මහේස්ත්‍රාත් රුවනි ජයවර්ධන නුගේගොඩ මහේස්ත්‍රාත්වරිය ලෙස පත්කර තිබේ.(Sunday Times)