ජංගම පොල් අලෙවි වැඩසටහනක් යටතේ පොල් සංවර්ධන අධිකාරිය විසින් පොල් රුපියල් 100 සහ 120 අතර සිල්ලර මිලකට ලබාදීම අද සිට ආරම්භ කෙරිණි.

ජනමාධ්‍ය නිවේදනයක් නිකුත් කරමින් එම අධිකාරිය පැවසුවේ පාරිභෝගිකයින්ට දැරිය හැකි මිලකට ලබාදීම සඳහා ජංගම පොල් අලෙවි වැඩසටහන දියත්කළ බවයි.

මෙම වැඩසටහනේ පළමු අදියර කොළඹ, ශ්‍රී ජයවර්ධනපුර කෝට්ටේ සහ කඩුවෙල මහ නගර සභා බල ප්‍රදේශයන්හිදී ආරම්භ කෙරිණි.

කිරුළපන පොළ, මුදල් අමාත්‍යාංශ පරිශ්‍රය, ශ්‍රී ජයවර්ධනපුර කෝට්ටේ මහ නගර සභා බලප්‍රදේශයේ වැලිකඩ පොලිස් ස්ථානය අසල එලෙස පොල් ජංගම අලෙවි රථ යොදවා ඇත.

අමතර ස්ථාන අතර නුගේගොඩ ආනන්ද සමරකෝන් එළිමහන් රංග පීඨය, කඩුවෙල සහ බත්තරමුල්ල ආවරණය වන පරිදි සෙත්සිරිපාය පරිශ්‍රය, ඩෙන්සිල් කොබ්බෑකඩුව මාවතේ පොල් වගාකිරීමේ මණ්ඩලය ආසන්නයේ ද පොල් අලෙවි ජංගම රථ යොදවා තිබේ.

මෙම වැඩසටහන යටතේ සඳුදා, බදාදා සහ සිකුරාදා දිනවල පොල් වගාකිරීමේ මණ්ඩලය පොල් ගෙඩි 10,000ක් අලෙවි කිරීමට නියමිතය.

මෙම වැඩසටහනෙන් අනතුරුව දිනකට පොල් ගෙඩි 5000ක් නිකුත් කෙරෙන අතර දේශීය ඉල්ලුමට සරිලන පරිදි මුළු පොල් ගෙඩි 15,000ක් නිකුත් කිරීමට සැලසුම් කර ඇත.

මීට අමතරව ඔක්තෝබර් 22 වැනිදා සිට කුරුණෑගල වැවිලි සමාගම මඟින් දිනකට පොල් ගෙඩි 1500 ක් ද හලාවත වැවිලි සමාගම මඟින් දිනකට පොල් ගෙඩි 3000 ක් ද ලබාදීමට නියමිතය.