අපරාධ පරීක්ෂණ දෙපාර්තමේන්තුවේ (CID) නිලධාරීන්, හිටපු පොලිස්පති දේශබන්දු තෙන්නකෝන් සොයාගැනීමේ උත්සාහයේ කොටසක් ලෙස, මාතර මොරවක පිහිටි හිටපු පාර්ලිමේන්තු මන්ත්‍රී සාගල රත්නායකගේ කාර්යාල පරිශ්‍රය සෝදිසි කර තිබේ.

මාතර මහේස්ත්‍රාත් අධිකරණය ඊයේ (11) නිකුත් කළ විවෘත අත්අඩංගුවට ගැනීමේ වරෙන්තුවකට අනුව මෙම සෝදිසි කිරීම සිදුකර ඇති අතර, තෙන්නකෝන් කොතැනක සිටියත් වහාම අත්අඩංගුවට ගෙන අධිකරණයට ඉදිරිපත් කරන ලෙස නිලධාරීන්ට නියෝග කර ඇත.

මේ අතර, තමා අත්අඩංගුවට ගැනීම වැළැක්වීමේ නියෝගයක් ඉල්ලා අභියාචනාධිකරණයට තෙන්නකෝන් ගොනුකළ පෙත්සමක් අද (12) විභාගයට ගැනිණි.

ඒ සම්බන්ධ තීන්දුව ලබන 17 වැනිදා ප්‍රකාශ කරන බව අභියාචනාධිකරණය ප්‍රකාශ කළේය.

මහජන ආරක්ෂක අමාත්‍යාංශයේ ලේකම් රවී සෙනෙවිරත්න සහ හිටපු CID අධ්‍යක්ෂ ජ්‍යෙෂ්ඨ පොලිස් අධිකාරී ශානි අබේසේකර යන අයගේ බලපෑම් මත තමා අත්අඩංගුවට ගන්නා බව තෙන්නකෝන් සිය පෙත්සමෙන් කියාසිටී.

මේ අතර, හිටපු පොලිස්පතිවරයා සොයා පොලිස් පරීක්ෂණ අඛණ්ඩව සිදුවෙමින් පවතී.