කොළඹ, මහනුවර, ඇල්ල සහ මාකුඹුර බහුවිධ ප්‍රවාහන මධ්‍යස්ථානයෙන් වාර්තා වූ දුම්රිය ඊ-ටිකට්පත් වංචාව සම්බන්ධයෙන් පරීක්ෂණයක් ආරම්භ කර ඇති බව අපරාධ පරීක්ෂණ දෙපාර්තමේන්තුව කොළඹ ප්‍රධාන මහේස්ත්‍රාත්වරියට දැනුම් දී තිබේ.

දුම්රිය මාර්ගගත ආසන වෙන්කිරීමේ ක්‍රියාවලියේදී ටිකට්පත් වහාම මිලදී ගෙන වැඩි මිලකට නැවත අලෙවි කළ සිද්ධියක් සම්බන්ධයෙන් පරීක්ෂණයක් ආරම්භ කර ඇති බව අපරාධ පරීක්ෂණ දෙපාර්තමේන්තුව ප්‍රධාන මහේස්ත්‍රාත් තනුජා ලක්මාලි වෙත දැනුම් දුන්නේය.

දුම්රිය ඊ-ටිකට්පත් නිකුත් කිරීම ශ්‍රී ලංකා දුම්රිය දෙපාර්තමේන්තුව සහ ශ්‍රී ලංකා මොබිටෙල් එක්ව ක්‍රියාත්මක කරයි.

දුම්රිය දෙපාර්තමේන්තුව විසින් අපරාධ පරීක්ෂණ දෙපාර්තමේන්තුවේ සයිබර් අපරාධ විමර්ශන අංශයට කරන ලද පැමිණිල්ලකට අනුව මෙම විමර්ශනය ආරම්භ කළ බව විමර්ශන නිලධාරීන් අධිකරණයට දන්වා තිබේ.

මෙම සිද්ධියට අදාළ පරීක්ෂණ අඛණ්ඩව කරගෙන යන බවත් එහි ප්‍රගතිය නුදුරු අනාගතයේ දී අධිකරණයට වාර්තාවකින් ඉදිරිපත් කරන බවත් නිලධාරීන් අධිකරණයට තවදුරටත් දැනුම් දී ඇත.