February 21, 2024
රුපියල් බිලියන 08ක පමණ දැවැන්ත මුදලක් වංචා කළ බව කියන පුද්ගලයෙකු සහ ඔහුගේ බිරිඳ අත්අඩංගුවට ගැනීම සඳහා අපරාධ පරීක්ෂණ දෙපාර්තමේන්තුව සහ ශ්‍රී ලංකා මහ බැංකුව වෙන් වෙන්ව පරීක්ෂණ ආරම්භ කර තිබේ.
අපරාධ පරීක්ෂණ දෙපාර්තමේන්තුවට සහ මහබැංකුවට ලැබී ඇති පැමිණිලි විශාල ප්‍රමාණයකට අනුව දිවයිනේ විවිධ ප්‍රදේශවල පුද්ගලයන් 22000ක් පමණ මොවුන්ගේ වංචාවට හසුවී ඇති බවත්, එය පිරමීඩ ජාවාරමට බෙහෙවින් සමාන බවත් වාර්තා සඳහන් කරයි.
රුපියල් මිලියන ගණනක් වටිනා අධ්‍යාපනික පැකේජ විවිධ පුද්ගලයන්ට බෙදා දී වෙළෙඳ ප්‍රජාවක් ස්ථාපිත කර, රටට ඩොලර් උපයා ගැනීම මෙම ක්‍රමයේ අරමුණ බව සැකකරු පුද්ගලයන්ට පොරොන්දු වී ඇති බව මූලික විමර්ශනවලදී අනාවරණයවී තිබේ.
ඔවුන් එක්සත් අරාබි එමීර් රාජ්‍යයේ සමාගමක ආයෝජනය කර ලැබෙන කොමිස් මුදල, මෙලෙස මුදල් ආයෝජනය කළ පුද්ගලයන්ට ලබාදෙන බවද මෙම පුද්ගලයා ප්‍රකාශ කර ඇති බව සඳහන් වේ.
සැකකරු මේ සඳහා කුරුණෑගල ප්‍රදේශයේ ව්‍යාපාරික පාසලක් සහ සමාගමක් ආරම්භ කර ඇති අතර ඔහු එහි සභාපතිවරයා ලෙසද කටයුතු කර තිබෙන බවද පැවැසේ.
ව්‍යාපාරික පාසල සහ සමාගම ලියාපදිංචි කළ බවට ව්‍යාජ ලේඛන සකස් කර මුදල් ආයෝජනය කරන පුද්ගලයන්ට පෙන්වා ඇති බව මූලික විමර්ශනවලදී අනාවරණය වී තිබේ.
මෙම ව්‍යාපාරය සඳහා ඇතැමුන් රුපියල් ලක්ෂ 10ත් 15ත් අතර මුදලක් ආයෝජනය කර ඇති අතර ඇතැමුන්ට කිසිදු ප්‍රතිලාභයක් ලැබී නොමැති බවද මූලික විමර්ශනවලදී අනාවරණය වී ඇත.
