මෙරටින් 2024 වසරේදී වාර්තා වූ නව යොවුන් වියේ ගැබ්ගැනීම් සංඛ්‍යාව 213 දක්වා ඉහළ ගොස් ඇතැයි ළමා හා කාන්තා අපයෝජන විමර්ශන කාර්යාංශයේ ප්‍රධානී නියෝජ්‍ය පොලිස්පති රේණුකා ජයසුන්දර පවසයි.

2023 වසරේදී මෙරටින් වාර්තා වූ 167ක් වූ ළමා ගැබ්ගැනීම් 2024 වන විට 213 දක්වා ඉහළ ගොස් ඇති බව රුපවාහිනී නාලිකාවක වැඩසටහනකට සහභාගී වෙමින් ඇය ප්‍රකාශ කළාය.

කෙසේවෙතත් ඇය පැවසුවේ, වසර දෙක අතර සමසත ළමා ලිංගික අපයෝජන සිදුවීම් සාපේක්ෂව නොවෙනස්ව පවතින බවයි.

“පසුගිය වසර දෙකේ දත්ත දෙස බලන විට සැලකිය යුතු අඩුවීමක් හෝ වැඩිවීමක් දකින්නට නැහැ. නිදසුනක් වශයෙන්, ලිංගික අපයෝජනය ශ්‍රී ලංකාවේ බහුලවම වාර්තා වනවා. ඒ අතරින්, ප්‍රේම සබඳතාවලින් පසුව වයස අවුරුදු 16ට අඩු දැරියන් දූෂණය කිරීම බහුලවම වාර්තා වන වරද වන අතර, බොහෝ අවස්ථාවලදී කාන්තා පාර්ශවයේ කැමැත්ත ඇතිව එය සිදුවෙනවා.”

2023 දී එවැනි සිදුවීම් 1,237 ක් සහ 2024 දී එවැනි සිදුවීම් 1,254 ක් වාර්තා වුණා. කෙසේවෙතත්, ළමා ගැබ් ගැනීම් 2023 දී 167 සිට 2024 වසරේදී 213 දක්වා වැඩි වෙලා තිබෙනවා. එවැනි සිදුවීම්වලදී තරුණ මව ගොදුරක් වනවා සේම එහි ප්‍රතිඵලයක් ලෙස උපදින දරුවාද ගොදුරක් බවට පත්වනවා. මෙම දරුවන් බොහෝ විට අධ්‍යාපන පද්ධතියෙන් ඉවත් වෙනවා. මේ තත්ත්වය විශේෂයෙන්ම සාකච්ඡා කළ යුතුයි.” ඇය පැහැදිලි කළාය.

මීට අමතරව, 2023 දී 103 ක් වූ ළමුන්ට එරෙහි කෲර සිදුවීම්වල සුළු වැඩිවීමක් පවතින බව පෙන්වා දුන් නියෝජ්‍ය පොලිස්පති රේණුකා ජයසුන්දර, වැඩිදුරටත් පැවසුවේ එම සංඛ්‍යාව 2024 වසරේදී 123 ක් දක්වා ඉහළ ගොස් ඇති බවයි.