October 24, 2024
ශ්‍රී ලංකාවේ දකුණු සහ නැගෙනහිර ප්‍රදේශවල සිටින ඊශ්‍රායල ජාතිකයන් ඉලක්ක කර ඉස්ලාමීය අන්තවාදීන්ගෙන් සිදුවිය හැකි තර්ජනයක් පිළිබඳව සති කිහිපයකට පෙර දේශීය බුද්ධි අංශ වෙත දැනුම්දීමත් සමඟ ශ්‍රී ලංකාව ඒ සම්බන්ධයෙන් අවධානය යොමුකර තිබූ බව ජ්‍යෙෂ්ඨ ආරක්ෂක ආරංචි මාර්ග සඳහන් කරයි.
පසුගිය වසරේ වැලිගම, මිරිස්ස සහ ආරුගම් බොක්ක ප්‍රදේශවලින් දේශීය පුරවැසියෝ කිහිපදෙනෙක් ඊශ්‍රායල ජාතිකයන් එම ප්‍රදේශවල පදිංචිවීම, ඔවුන්ගේ වීසා බලපත්‍රවල වලංගු කාලය ඉක්මවා රැඳීසිටීම සහ නීතිවිරෝධී ව්‍යාපාර පවත්වාගෙන යෑම පිළිබඳව කණස්සල්ල පළකළහ.
ජනමාධ්‍ය විසින් සිදුකරන ලද බිම් මට්ටමේ පරීක්ෂණයකදී ප්‍රදේශවාසීන් පවසා ඇත්තේ, මෙම ඊශ්‍රායල් ජාතිකයන්ගෙන් තමන්ට නිතර තර්ජන එල්ල වන බවත්, මෙම පුද්ගලයන් කිසිවිටෙකත් ප්‍රදේශවාසීන්ට ඔවුන්ගේ සාදවලට සහ ව්‍යාපාරික ආයතනවලට ඇතුළු වීමට ඉඩනුදුන් බවත්ය.
බලධාරීන් විසින් නිශ්චිත ක්‍රියාමාර්ග නොගත් බැවින් එම විදේශිකයන් කාලයාගේ ඇවෑමෙන් සංඛ්‍යාත්මකව වර්ධනය වී ඇති අතර මැදපෙරදිග මෑතකාලීන අර්බුධ හේතුවෙන් ඉස්ලාමීය අන්තවාදයේ තර්ජනය කලාපය තුළ වර්ධනය විය.
එහි ප්‍රතිඵලයක් වශයෙන්, සති කිහිපයකට පෙර, ඊශ්‍රායල ජාතිකයන් සහ බටහිර ජාතිකයන් බහුලව ගැවසෙන නැගෙනහිර සහ දකුණේ තර්ජනයක් ඇතිවිය හැකි බවට ශ්‍රී ලංකාවේ බුද්ධි අංශ වෙත දැනුම් දී ඇති අතර, එම ප්‍රදේශයේ ආරක්ෂාව තරකිරීමට සහ බුද්ධි නිලධාරීන් භූමියේ ස්ථානගත කිරීමට කටයුතු කෙරිණි.
ඒ අනුව විශේෂකාර්ය බළකායේ නිලධාරීන් විසින් ආරක්ෂක තත්ත්වය පාලනය කර අද දක්වාම ස්ථානගත කර ඇත.
පොලිස් විශේෂකාර්ය බළකායද, ඕනෑම හදිසි අවස්ථාවකදී බෝම්බ නිශ්ක්‍රීය අංශයද සීරුවෙන් තබා ඇති බව දැනගන්නට ඇත.
ඉන්පසුව, ජනාධිපතිවරණයට දින කිහිපයකට පෙර දේශීය බුද්ධි අංශයට විදේශීය බුද්ධි අංශවලින් දෙවැනි තර්ජන ඇඟවීම ලැබී තිබේ.
එහෙත් ඒ වන විටත් ආරක්ෂාව තරකර තිබූ අතර සියලු ආරක්ෂක පියවර ගෙන තිබිණි.
කෙසේවෙතත්, ඊයේ උදෑසන ශ්‍රී ලංකාවේ එක්සත් ජනපද තානාපති කාර්යාලය සිය පුරවැසියන්ට, නැවත දැනුම්දෙන තුරු ආරුගම් බොක්ක වෙත ගමන් කිරීමෙන් වළකින ලෙස සංචාරක උපදේශනයක් නිකුත් කිරීමත් සමඟ කාරණය නරක අතට හැරිණි.
ආරුගම් බොක්ක ප්‍රදේශයේ ජනප්‍රිය සංචාරක ස්ථාන ඉලක්ක කරගනිමින් එල්ල විය හැකි ප්‍රහාරයක් පිළිබඳව විශ්වාසනීය තොරතුරු ලැබී ඇති බවත්, පූර්වාරක්ෂාවක් ලෙස තානාපති කාර්යාලය විසින් නැවත දැනුම්දෙන තුරු ආරුගම් බොක්ක වෙත ක්ෂණික ගමන් තහනමක් පනවා ඇති බවත් එහි සංචාරක උපදේශනයේ සඳහන් විය.
“මෙම කාලය තුළ එම ප්‍රදේශයේ ගැවසීමෙන් වැළකී සිටින ලෙස එක්සත් ජනපද පුරවැසියන්ට දැඩි ලෙස උපදෙස් දෙනු ලැබේ.
119 ඇමතීමෙන් පළාත් පාලන ආයතන වෙත කිසියම් සැකකටයුතු ක්‍රියාකාරකමක් හෝ හදිසි අවස්ථාවක් වාර්තා කරන ලෙස තානාපති කාර්යාලය පුරවැසියන් දිරිමත් කරයි,” යැයි තානාපති කාර්යාලය පැවසීය.
ජංගම දුරකථන වැනි සන්නිවේදන උපාංග ළඟ තබාගැනීම සහ යාවත්කාලීන තොරතුරු සඳහා ප්‍රාදේශීය මාධ්‍ය අධීක්ෂණය කිරීම ද එය නිර්දේශ කළේය.
මෙම උපදේශනය අනුගමනය කරමින් ඔස්ට්‍රේලියාව, රුසියාව, නවසීලන්තය සහ එක්සත් රාජධානිය ඔවුන්ගේ උපදේශන යාවත්කාලීන කළ බව එක්සත් ජනපද ප්‍රකාශයේ සඳහන් වේ.
කොළඹ රුසියානු තානාපති කාර්යාලය සිය පුරවැසියන්ගෙන් ඉල්ලා සිටියේ සුපරීක්ෂාකාරීව සිටින ලෙසත්, කලාපය තුළ ජනයා ඒකරාශී වන ස්ථානවලට ගමන් කිරීමෙන් වළකින ලෙසත්ය.
මේ අතර, ඊශ්‍රායල ජාතික ආරක්ෂක කවුන්සිලය බදාදා ඊශ්‍රායල ජාතිකයන්ගෙන් ඉල්ලා සිටියේ ත්‍රස්තවාදී ප්‍රහාරයක් එල්ල වීමේ තර්ජනය හේතුවෙන් දකුණු ශ්‍රී ලංකාවේ සංචාරක ප්‍රදේශ කිහිපයකින් වහාම ඉවත් වන ලෙසත්ය.
මෙම අනතුරු ඇඟවීම ආරුගම් බොක්ක ප්‍රදේශයට සහ ශ්‍රී ලංකාවේ දකුණේ සහ බටහිර වෙරළ තීරයන්ට අදාළ වූ බවත්, “සංචාරක ප්‍රදේශ සහ වෙරළ තීරයන් කෙරෙහි අවධානය යොමු කර ඇති ත්‍රස්තවාදී තර්ජනයක් පිළිබඳ වත්මන් තොරතුරු” වලින් පැනනගින බවත් ආරක්ෂක කවුන්සිලය සඳහන් කළේය.
යුරෝපයේ ශීත සමය ශ්‍රී ලංකාවේ සංචාරක ව්‍යාපාරයේ උච්චතම සමයක් වීමත් සමඟ එම කර්මාන්තයට මෙය සුබ පුවතක් නොවේ.
මෙම අන්තර්ජාතික අනතුරු ඇඟවීම් වලින් පසු පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව ජනමාධ්‍ය වෙත කියාසිටියේ ආරුගම් බොක්ක ප්‍රදේශයේ ඊශ්‍රායල සංචාරකයන්ට එල්ල විය හැකි තර්ජන සම්බන්ධයෙන් පසුගිය දින කිහිපය තුළ වාර්තා කිහිපයක් ලැබුණු බවයි.
විශේෂයෙන් සර්ෆින් ක්‍රීඩාව හේතුවෙන් ආරුගම් බොක්ක සහ පොතුවිල් ප්‍රදේශ ඊශ්‍රායල සංචාරකයින් අතර ජනප්‍රිය වී ඇති බව ඔහු පැවැසීය.
එල්ල විය හැකි තර්ජන සැළකිල්ලට ගෙන නැගෙනහිර පළාතේ ජ්‍යෙෂ්ඨ නියෝජ්‍ය පොලිස්පතිවරයා විසින් කිසිදු සිදුවීමක් සිදුනොවීමට මූලික පියවර ගෙන ඇති බව පොලිස් මාධ්‍ය ප්‍රකාශකවරයා පැවැසීය.
එක්සත් ජනපද තානාපති කාර්යාලය උපදේශනය නිකුත් කිරීමට පෙර පොලිසිය තර්ජන සම්බන්ධයෙන් ආරක්ෂක පියවර ගෙන ඇති බව ආරංචි මාර්ග පවසයි.
“පසුගිය දින කිහිපය තුළ පොලිසිය මාර්ග බාධක යොදා එම ප්‍රදේශයේ වාහන පරීක්‍ෂා කිරීම් සිදු කළා. මේ වන විට පොලිසිය, විශේෂ කාර්ය බළකාය (STF) සහ ත්‍රිවිධ හමුදාව විසින් විශේෂ ඒකාබද්ධ ආරක්ෂක විධිවිධාන ක්‍රියාත්මක කරමින් පවතිනවා” පොලිස් මාධ්‍ය ප්‍රකාශකවරයා පැවැසීය.
ආරුගම් බොක්කෙහි පිහිටි ගොඩනැගිල්ලක් ඊශ්‍රායල ජාතිකයන් විසින් ‘චබාද් නිවෙසක්’ බවට පරිවර්තනය කිරීම හේතුවෙන් ප්‍රදේශයේ ආන්දෝලනයක් ද ඇති වූ බව වාර්තා වේ.
චබාද් නිවසක් යනු ඊශ්‍රායල ජාතිකයන්ගේ ආගමික ස්ථානයකි.
මාතර දිස්ත්‍රික්කයේ සමගි ජනබලවේගයේ අපේක්ෂක රෙහාන් ජයවික්‍රම පවසන්නේ, ඊශ්‍රායල ව්‍යාපාර පිහිටි ප්‍රදේශ ආරක්ෂා කරමින්, පසුගිය සති කිහිපය තුළ පොලිසිය මාර්ග බාධක දමා ආරක්ෂාව සැපසූ බලධාරීන්, එම විදේශිකයින්ගෙන් නීතිවිරෝධී ලෙස රට තුළ රැඳීසිටීම සම්බන්ධයෙන් ප්‍රශ්න නොකරන්නේ ඇයිද යන්න විමසා බැලිය යුතු බවයි.
ඔහු කියාසිටියේ වර්ධනය වන ඊශ්‍රායල ව්‍යාපාර පිළිබඳව වසර ගණනාවක් තිස්සේ බලධාරීන් දැනුවත් කළ නමුත් කිසිදු පියවරක් ගෙන නොමැති බවයි.
“මෙම ඊශ්‍රායල ජාතිකයන් නීතිවිරෝධී ලෙස මෙහි රැඳීසිටීම නිසා ශ්‍රී ලංකාව ද වෙනත් රටවල් මෙන් නුදුරේදීම යුද පිටියක් වනු ඇත” යැයි රෙහාන් ජයවික්‍රම පවසයි.
මේ අතර එළඹෙන සංචාරක සමය තුළ විදේශ සංචාරකයන්ගේ පැමිණීම අපේක්ෂාවෙන් සහ මැදපෙරදිග සහ නැගෙනහිර යුරෝපයේ පවතින ගැටුම්කාරී තත්ත්වයන් සැළකිල්ලට ගනිමින් විදේශ සංචාරකයන්ගේ ආරක්ෂාව තහවුරු කිරීම සඳහා ආරක්ෂක අමාත්‍යාංශය සහ මහජන ආරක්ෂක අමාත්‍යංශය එක්ව විශේෂ ආරක්ෂක වැඩපිළිවෙළක් ක්‍රියාත්මක කිරීමට පොලිසිය කටයුතු කරමින් සිටියි.
