2025 අප්‍රේල් 21 වන දින දක්වා පෙරවරු 9.00 සිට පස්වරු 3.00 දක්වා ස්වේච්ඡාවෙන් තම සූර්ය පැනල පද්ධති ක්‍රියාවිරහිත කරන ලෙස ලංකා විදුලිබල මණ්ඩලය ශ්‍රී ලංකාව පුරා සිටින සියලුම සූර්ය පැනල පද්ධති හිමිකරුවන්ගෙන් ‍යළි ඉල්ලීමක් කර තිබේ.

මේ සම්බන්ධයෙන් නිවේදනයක් නිකුත් කරමින් විදුලිබල මණ්ඩලය පවසන්නේ, සිංහල සහ දෙමළ අලුත් අවුරුදු නිවාඩු කාලය තුළ ජාතික විදුලිබල පද්ධතියේ ආරක්ෂාව සහ ස්ථාවරත්වය පිළිබඳ උපරිම සැළකිල්ලක් දක්වන බැවින් මෙම ඉල්ලීම කළ බවයි.

පාරිභෝගික ඉල්ලුම අවම මට්ටමක පවතින මොහොතක අව් රශ්මිය නිසා සූර්ය බලයෙන් ඉහළ නිෂ්පාදනයක් සිදු වී ඇති අතර, එය ජාල ස්ථායීතාවයට බරපතල අවදානම් ඇතිකරයි.

තත්ත්වය පිළිබඳ වඩා හොඳ අවබෝධයක් ලබාදීම සඳහා ලංකා විදුලිබල මණ්ඩලය තාක්ෂණික අභියෝග සරලව දක්වා ඇත.

එම මණ්ඩලය නිකුත් කර ඇති නිවේදනය අනුව, දිගු අප්‍රේල් නිවාඩු කාලය තුළ, විදුලි ඉල්ලුම සැළකිය යුතු ලෙස පහත වැටෙන විට, එමෙන්ම හිරු එළිය බහුල වන විට, වෙනත් ඕනෑම රටක මෙන් මෙරට බලශක්ති පද්ධතිය ද මෙම අභියෝගයට මුහුණදෙයි.

එය සිදුවන ආකාරය පිළිබඳව ද විදුලිබල මණ්ඩලය මෙලෙස පැහැදිළි කරයි.

* අධික සූර්ය බලය දිවා කාලයේ විදුලිබල පද්ධතියට ගලායයි.

* ඉල්ලුම (භාවිත කිරීම) ඉතා අඩුය, විශේෂයෙන්ම බොහෝ කර්මාන්තශාලා සහ කාර්යාල වසා ඇත.

* මෙම තත්ත්වය තුලනය කිරීම සඳහා, විදුලිබල මණ්ඩලය ජල, ගල්අඟුරු, සහ අනෙකුත් තාප බලාගාර වැනි විශාල බලාගාර වසාදමයි.

* කෙසේවෙතත්, පාරිභෝගිකයන් විසින් සූර්ය පැනල මගින් සිදුවන නිෂ්පාදනය වසාදැමුවහොත් මිස විදුලිබල මණ්ඩලයට ඒවා පාලනය කළ නොහැක.

* විශාල බලාගාර මගින් විදුලි සංඛ්‍යාතය ස්ථායීව තබාගැනීමට උපකාර වන ‘අවස්ථිති’ ලෙස හඳුන්වන ජාලයට තීරණාත්මක සේවාවක් සපයයි. සූර්ය පැනල පද්ධති ජාලයට මෙම සහතිකය ලබාදිය නොහැක.

සිය ප්‍රකාශයේ සූර්ය බලශක්ති උත්පාදනය තාවකාලිකව සීමා කිරීමේ අවශ්‍යතාවය ලංකා විදුලිබල මණ්ඩලය තවදුරටත් පැහැදිලි කර ඇත.

* සියලුම වහල මත ඇති සූර්ය පැනල පද්ධති ලංකා විදුලිබල මණ්ඩලයේ පාලන මධ්‍යස්ථානයට දැකීමට හෝ පාලනය කිරීමට නොහැක.

* ඒවා ස්වයංක්‍රීයව ක්‍රියාත්මක වන්නේ සූර්යාලෝකය මත මිස පාරිභෝගිකයන්ගෙන් සැබෑ විදුලි ඉල්ලුම මත නොවේ.

* ඉල්ලුම අඩු වූ විට සහ සූර්ය නිමැවුම වැඩි වූ විට, සම්ප්‍රදායික බලාගාර නොබැඳි ලෙස ක්‍රියාකෙරෙන අතර, ජාලකය අස්ථායී වේ.

Battery Energy Storage Systems, ජල බැටරි සහ ග්‍රිඩ් සාදන ඉන්වර්ටර් බහුලව යොදවනතුරු, ශ්‍රී ලංකාවේ ජාලකය අවස්ථිති බව සැපයීමට සහ ස්ථාවරත්වය සහතික කිරීමට විශාල සමමුහුර්ත යන්ත්‍ර මත විශ්වාසය තැබිය යුතුය.

දැනට ශ්‍රී ලංකාව සතුව ප්‍රමාණවත් තරම් Battery Energy Storage Systems හෝ මෙම ආධාරය ලබාදිය හැකි දියුණු සූර්ය ඉන්වර්ටර් නොමැත.