අල්ලස් කොමිසම විසින් අල්ලස් ඉල්ලා සිටියදී අත්අඩංගුවට ගත් කොළඹ අපරාධ කොට්ඨාශයට අනුයුක්තව සේවය කරන පොලිස් පරීක්ෂකවරයා, ඔහුගේ සිරමැදිරිය තුළ සිටි තවත් රැඳවියකු වෙතින් පහර කා ඇතැයි වාර්තා වේ.

පොලිස් නිලධාරියා රඳවා සිටි සිරමැදිරියේම සිටි සිරකරුවෙකු තියුණු ආයුධයකින් පොලිස් පරීක්ෂකවරයාගේ මුහුණට තුවාල සිදුකර ඇති බව ආරංචි මාර්ග පවසයි.

සිද්ධියෙන් පසු පොලිස් නිලධාරියාගේ මුඛයට මැහුම් 8ක් දමා ඇති බවද වාර්තා වේ.

සිකුරාදා (05) දෙමටගොඩ CCD පරිශ්‍රය තුළදී අල්ලස් කොමිසම විසින් සැකකරුවන් දෙදෙනා අත්අඩංගුවට ගනු ලැබීය.

ඔවුන් රුපියල් 450,000 ක අල්ලසක් ඉල්ලා ඇති අතර, ඉන් රුපියල් 150,000ක මුදලක් ලබාගනිමින් සිටියදී අත්අඩංගුවට ගෙන ඇත.

කුරුණෑගල, ඉබ්බාගමුව ප්‍රදේශයේ පදිංචි පුද්ගලයෙකු විසින් ‘USDT’ නමැති විද්‍යුත් මුදල් ඒකකය අන්තර්ජාලය හරහා හුවමාරු කර ගනිමින් සිදුකරන ලද වංචනික මුදල් හුවමාරුවක් සම්බන්ධයෙන් CCD වෙත පැමිණිල්ලක් ඉදිරිපත් කර තිබිණි.

සිද්ධියට සම්බන්ධ සැකකරුවන් දෙදෙනෙකු අත්අඩංගුවට ගෙන අධිකරණයට ඉදිරිපත් කළ බව සැකකාර පොලිස් නිලධාරීන් දෙදෙනා පැමිණිල්ලට ප්‍රකාශ කර ඇත.

අනතුරුව පැමිණිලිකරු අත්අඩංගුවට ගැනීමෙන් වැළකී සිටීමට ඔවුන් රුපියල් 454,200ක අල්ලසක් ඉල්ලා තිබේ.

අදාළ පුද්ගලයා මුලදී අල්ලස් මුදලේ පළමු ගෙවීම ලෙස පොලිස් නිලධාරීන් දෙදෙනාට රුපියල් 300,000 ක මුදලක් ලබා දී ඇති අතර ඉතිරි මුදල ලබාගැනීමේදී ඔවුන් දෙදෙනා අත්අඩංගුවට ගත් බව අල්ලස් කොමිසම පවසයි.