විද්‍යාඥයන් විසින් ප්‍රථම වරට සඳ මත ගුහාවක් සොයාගෙන ඇත.

අඩුම තරමින් මීටර් 100ක් පමණ ගැඹුරකින් යුත් එය මිනිසුන්ට ස්ථිර පදනමක් ගොඩනගා ගැනීමට සුදුසුම ස්ථානයක් විය හැකි බව ඔවුහු පවසති.

පර්යේෂකයන්ට අනුව, එය “භූගත, සොයානොගත් ලෝකයක” සැඟවී ඇති ගුහා සිය ගණනකින් එකක් පමණි.

සඳ මත ස්ථිර මිනිස් පැවැත්මක් ඇතිකර ගැනීමට රටවල් තරගයක සිටින නමුත් විකිරණ, අධික උෂ්ණත්වය සහ අභ්‍යවකාශ කාලගුණයෙන් ගගනගාමීන් ආරක්ෂා කිරීමට ඔවුන්ට අවශ්‍ය වනු ඇත.

අභ්‍යවකාශයට ගිය පළමු බ්‍රිතාන්‍ය ගගනගාමී කාන්තාව වන හෙලන් ෂර්මන් බීබීසී පුවත් සේවයට පවසා ඇත්තේ, අලුතින් සොයාගත් ගුහාව කඳවුරක් සඳහා හොඳ ස්ථානයක් ලෙස පෙනෙන බවයි.

වසර 20-30 කින් මිනිසුන් චන්ද්‍ර වළවල්වල ජීවත් විය හැකි බවත් ඇය පවසයි.

එහෙත්, මෙම ගුහාව කෙතරම් ගැඹුරුද යත්, ගගනගාමීන්ට පිටතට යෑමට ජෙට් පැක් හෝ සෝපානයක් භාවිතා කිරීමට අවශ්‍ය විය හැකි බව ඇය පැවසුවාය.

ඉතාලියේ ට්‍රෙන්ටෝ විශ්වවිද්‍යාලයේ Lorenzo Bruzzone සහ Leonardo Carrer මෙම ගුහාව සොයාගත්තේ රේඩාර් ආධාරයෙන් Mare Tranquillitatis නම් පාෂාණමය තැනිතලාවක වළක් විවර කිරීමෙනි.

එය පෘථිවියේ සිට පියවි ඇසට පෙනෙන අතර 1969 දී ඇපලෝ 11 යානය ගොඩබස් වන ලද ස්ථානය ද වේ.

එය වසර මිලියන ගණනකට හෝ බිලියන ගණනකට පෙර සඳ මත ලාවා ගලායන විට නිර්මාණය වූවක් බව සැලකේ.