January 15, 2024
න්‍යෂ්ටික බලශක්තිය පිළිබඳ යෝජනා කැඳවීමට අදාළ ලේඛන දෙකක් ශ්‍රී ලංකා පරමාණුක බලශක්ති අධිකාරිය විසින් කැබිනට් අනුමැතිය සඳහා සකස් කර තිබේ.
ඉන් එක් යෝජනාවක් අනාගත ආයෝජකයන්ගෙන් උනන්දුව ප්‍රකාශ කිරීම සඳහා කැඳවීම් සිදුකිරීමට වන අතර සහ අනෙක බලශක්ති මිශ්‍ර ව්‍යාප්තිය පිළිබඳ රජයේ ප්‍රතිපත්තිය පිළිබඳ බව නිලධාරියෙක් පැවසීය.
ශ්‍රී ලංකා පරමාණුක බලශක්ති අධිකාරිය මෙම ලේඛන සකස් කර ඇත්තේ රුසියාව, ප්‍රංශය සහ ඩෙන්මාර්කය වැනි විවිධ රටවල් මෙරට න්‍යෂ්ටික බලශක්තිය වර්ධනය කිරීමට අවශ්‍යතා සොයමින් සිටින පසුබිමකය.
ශ්‍රී ලංකා පරමාණුක බලශක්ති අධිකාරිය විසින් මෙම පියවර ගෙන ඇත්තේ රුසියාව විසින් ඉන්දියාවේ සහ බංග්ලාදේශයේ සිදුකරන ලද පරිදි මෙරට අක්වෙරළ හෝ වෙරළබඩ න්‍යෂ්ටික බලාගාර පිහිටුවීම සඳහා යෝජනා ඉදිරිපත් කර තිබියදී වීම ද විශේෂත්වයකි.
ශ්‍රී ලංකා පරමාණුක බලශක්ති අධිකාරියේ සභාපති මහාචාර්ය එස්.ආර්.ඩී. රෝසා පවසා ඇත්තේ, විවිධ රටවල් විසින් යෝජනා ඉදිරිපත් කර ඇති අතර රුසියානු යෝජනාව ශ්‍රී ලංකාවට සළකා බැලීමට තරම් පුළුල් බව පෙනී යන බවයි.
“අපි සකස් කළ ලේඛන කැබිනට් අනුමැතිය සඳහා යොමු කිරීමට විදුලිබල හා බලශක්ති අමාත්‍යංශය වෙත ඉදිරිපත් කර තිබෙනවා,” ඔහු පැවසීය.
යෝජනා සාකච්ඡා කිරීමට Rosatom රාජ්‍ය න්‍යෂ්ටික බලශක්ති සංස්ථාවෙන් නියෝජිත පිරිසක් යැවීමට ද රුසියාව එකඟ වී ඇත.
