ජනාධිපති ඩොනල්ඩ් ට්‍රම්ප්ගේ තීරුබදු පැනවීම අභියෝගයට ලක්කරමින් කැලිෆෝනියා ආණ්ඩුකාර ගැවින් නිව්සෝම් විසින් නඩුවක් ගොනුකර තිබේ.

බදු අයකිරීම් සම්බන්ධයෙන් අමෙරිකාවේ ප්‍රාන්තයක් නඩු පවරා ඇති පළමු අවස්ථාව මෙය වන අතර, ජනාධිපතිවරයාට එම බදු ක්‍රියාත්මක කිරීමට බලය ලබාදුන් හදිසි නියෝග ඉන් අභියෝගයට ලක්කරයි.

කැලිෆෝනියාව යනු, එක්සත් ජනපදයේ නිෂ්පාදන හා කෘෂිකාර්මික නිෂ්පාදනවල විශාලතම නිවහන වේ.

තීරුබදු විසින් අන්තර්ජාතික වෙළඳාමේ අසමතුලිතතාවන් විසඳන බවට තර්ක කර ඇති ධවල මන්දිරය, මෙම නඩුව නොසළකා හැර ඇති අතර, බදු අඛණ්ඩව ක්‍රියාත්මක කරන බව පවසයි.

“කැලිෆෝනියාවේ පැතිර යන අපරාධ, නිවාස නොමැතිකම සහ දැරිය නොහැකි බව කෙරෙහි අවධානය යොමුකරනවා වෙනුවට, අපේ රටේ අඛණ්ඩ භාණ්ඩ වෙළඳ හිඟයේ ජාතික හදිසි අවස්ථාව ආමන්ත්‍රණය කිරීමට ජනාධිපති ට්‍රම්ප් ඉදිරිපත් කර ඇති ඓතිහාසික ප්‍රයත්නයන් අවහිර කිරීමට ගැවින් නිව්සෝම් ඔහුගේ කාලය ගතකරයි,” යනුවෙන් ධවල මන්දිර ප්‍රකාශක Kush Desai පවසා ඇත.

නිව්සෝම් සහ ප්‍රාන්තයේ නීතිපති රොබ් බොන්ටා මෙම නඩුව පිළිබඳ තොරතුරු කැලිෆෝනියාවේ නිෂ්පාදනය කරන විශාලතම බෝගවලින් එකක් වන ආමන්ඩ් ගොවිපොළක පැවැති ප්‍රවෘත්ති සාකච්ඡාවකදී ප්‍රකාශයට පත්කළහ.

ලෝකයේ ආමන්ඩ්වලින් 82% කට ආසන්න ප්‍රමාණයක් පැමිණෙන්නේ කැලිෆෝනියාවෙන් ය.

කෙසේවෙතත් ආණ්ඩුකාර නිව්සෝම් තර්ක කළේ, කැලිෆෝනියාවට තීරුබදු ගැටලුව අසමාන ලෙස බලපා ඇති බවත්, ජනවාරි මාසයේ සිට ට්‍රම්ප්ට එරෙහිව දැනටමත් නඩු 15 ක් ගොනුකර ඇති ප්‍රාන්ත රජය, බදුවලට එරෙහි චෝදනාවට නායකත්වය දෙනු ඇති බවයි.

තීරුබදු පැනවීම සඳහා අන්තර්ජාතික හදිසි ආර්ථික බලතල පනත ට්‍රම්ප් විසින් භාවිත කිරීම මෙම නඩුව මගින් අභියෝග‍යට ලක්කරයි.

එම පනත කිසි විටෙකත් එවැනි අයකිරීම් සඳහා භාවිත කර නොමැති බවත්, එවැනි බලතල එක්සත් ජනපද කොන්ග්‍රසය සතු බවත් නඩුවෙන් තර්ක කරයි.