ජාතික ජන බලවේගය රජය දෝෂාභියෝගයක් ඉදිරිපත් කිරීමට සූදානම් වෙමින් සිටි අභියාචනාධිකරණ සභාපති නිශ්ශංක බන්දුල කරුණාරත්න ජනාධිපති අනුර කුමාර දිසානායක වෙත සිය ඉල්ලා අස්වීමේ ලිපිය භාර දී ඇති බව වාර්තා වේ.

රාජ්‍ය පුවත්පතක් වන දිනමිණ පුවත්පත වාර්තා කර ඇත්තේ මේ නිසා විනිසුරු කරුණාරත්න ඉවත් කිරීම සඳහා ගෙන ඒමට නියමිතව තිබූ දෝෂාභියෝග යෝජනාව නැවැත්වීමට රජය තීරණය කර ඇති බවයි.

2025 පෙබරවාරි 01 වැනි දින සිට බලපැවැත්වෙන පරිදි ඉල්ලා අස්වීමට තීරණය කර ඇති බව විනිසුරු කරුණාරත්න ජනාධිපති දිසානායක වෙත දන්වා තිබේ.

අභියාචනාධිකරණ විනිසුරුවරුන්ගේ විශ්‍රාම යන වයස වන වයස අවුරුදු 63ක් වන නිසා ඔහුට වයස අවුරුදු 63 පිරෙන මේ වසරේ ජුනි 16 වැනි දින ඔහු විශ්‍රාම යෑමට නියමිතව සිටියේය.

විනිසුරු කරුණාරත්නට එරෙහිව දෝෂාභියෝගයක් ගෙන ඒමට රජය සැලසුම් කරමින් සිටින බව මීට පෙර වාර්තා විය.

මහේස්ත්‍රාත්වරයකු ලෙස අධිකරණ ජීවිතය ආරම්භ කර පසුව අභියාචනාධිකරණයේ සභාපති ධුරයට පත් වූ නිශ්ශංක බන්දුල කරුණාරත්න, හිටපු ජනාධිපති රනිල් වික්‍රමසිංහ විසින් ශ්‍රේෂ්ඨාධිකරණයට පත් කිරීමට නිර්දේශ කරන ලදී.

කෙසේවෙතත්, ආණ්ඩුක්‍රම ව්‍යවස්ථා සභාව එම නාමයෝජනා ප්‍රතික්ෂේප කර තිබිණි.

පසුව නීතිඥයකු ආණ්ඩුක්‍රම ව්‍යවස්ථා සභාවේ තීරණයට අභියෝග කරමින් ශ්‍රේෂ්ඨාධිකරණයේ මූලික පෙත්සමක් ගොනු කළේය.

පසුගිය වසරේ දෙසැම්බර් මාසයේදී ශ්‍රේෂ්ඨාධිකරණය එම පෙත්සම නිෂ්ප්‍රභ කළේය.

මාධ්‍ය වාර්තාවලට අනුව, විනිසුරු නිශ්ශංක බන්දුල කරුණාරත්නට එරෙහිව දෝෂාභියෝග යෝජනාව සඳහා පදනම ලෙස ශ්‍රේෂ්ඨාධිකරණය විසින් කරන ලද සමහර නිරීක්ෂණ භාවිත කිරීමට රජය සළකා බලා ඇත.