ශ්‍රී ලංකාවේ නව රජය ණය බරින් මිරිකී ඇති ජාතික ගුවන් සේවය වන ශ්‍රීලන්කන් එයාර්ලයින්ස් විකිණීමේ සැලසුම් අත්හැර දමා ඇති නමුත් එය වඩාත් ලාභදායී අනාගතයක් සඳහා ප්‍රතිව්‍යුහගතකරණය කරනු ඇත.

“මෙය සියලු ශ්‍රී ලාංකිකයින්ට ආඩම්බර වන ආයතනයක් විය යුතු බවටත්, එය ශ්‍රී ලාංකිකයන් සතු විය යුතු බවටත් ජනාධිපති අනුර කුමාර දිසානායක මහතා උපදෙස් දී ඇත” යැයි ගුවන් සේවයේ නව සභාපති සරත් ගනේගොඩ TTG Asia වෙත පවසා තිබේ.

වසර ගණනාවක් තිස්සේ පාඩු ලබමින් සිටින ගුවන් සමාගම කොටස් වශයෙන් විකිණීමට සහ කළමනාකරණය කිරීමට පසුගිය ආණ්ඩුව ලංසු කැඳවා තිබිණි.

ගුවන් සමාගම 2022 අප්‍රේල් සිට 2023 මාර්තු දක්වා කාලය සඳහා මෙහෙයුම් ලාභයක් වාර්තා කර ඇති අතර, එහි සමුච්චිත ණය ප්‍රමාණය ඇමෙරිකානු ඩොලර් බිලියන 1.2 කි.

පෙර සැලැස්ම යටතේ, රජය විසින් ගුවන් සේවයේ සියයට 51 ක පාලනය රඳවා තබාගන්නා අතර ඉතිරි සියයට 49 ආයෝජකයන්ට විකිණීමට නියමිත විය.

ගුවන් සේවයක් පවත්වාගෙන යෑමේ පළපුරුද්දක් නොමැති පාර්ශව හයක්, ඊට ප්‍රතිචාර දැක්වූ නමුත් කිසිවකු ක්‍රියාවලියේ ඊළඟ පියවර සඳහා පූර්ව සුදුසුකම් ලබා නොතිබිණි.

පසුගිය මාසයේ පැවති ජනාධිපතිවරණයෙන් ජාතික ජන බලවේගයේ අනුර කුමාර දිසානායක ජයග්‍රහණය කළේය.

හිටපු පාලනය ගෙන ගිය රාජ්‍ය වත්කම් විකිණීම නතර කරන බවට ඔහු සපථ කර තිබිණි.

ජනාධිපති අනුර දිසානායක ශ්‍රී ලංකන් ගුවන් සේවය ඇතුළු පාඩු ලබන රාජ්‍ය ආයතන විකිණීමේ වගකීම පැවරුණු රජයේ ඒකකය කඩිනමින් විසුරුවා දැමීය.

මෙම ගුවන් සේවය සංචාරක ව්‍යාපාරයේ වැදගත් කුළුණක් බවත්, රට තුළට පැමිණෙන සංචාරක ගමනාගමනයෙන් සියයට 50 කට වගකිව යුතු බවත් සභාපතිවරයා පවසයි.

ලබන වසරේ සංචාරකයන් මිලියන 3ක් සහ 2030 වන විට මිලියන පහක් සංචාරකයන් ඉලක්ක කර ගනිමින් මේ වසරේ මිලියන 2.3ක් පැමිණෙනු ඇතැයි ශ්‍රී ලංකාව අපේක්ෂා කරයි.

ගුවන් සේවය විකිණීම නතරකර ඇති අතර, සුදුසු ව්‍යාපාරික ආකෘතියක් යටතේ ගුවන් සේවය ප්‍රතිව්‍යුහගතකරණය කිරීමට සැලසුම් කර ඇති බව ඔහු පවසා ඇත.