June 18, 2023
එක්සත් ජනපද රාජ්‍ය ලේකම් ඇන්ටනි බ්ලින්කන් දින දෙකක සංචාරයක් සඳහා බීජිං වෙත පැමිණ තිබේ.
වසර පහකට ආසන්න කාලයකට පසු ඇමරිකානු රාජ්‍ය තාන්ත්‍රිකයෙකු චීනයේ නිල සංචාරයක නිරත වන්නේ පළමුවරටය.
අමෙරිකානු බලධාරීහු පවසන්නේ මෙම සාකච්ඡාවල ප්‍රධාන අරමුණ අතිශයින් උණුසුම් වී ඇති ද්විපාර්ශ්වික සබඳතාවයන් ස්ථාවර කර ගැනීම බවයි.
මීට පෙර බ්ලින්කන් පෙබරවාරි මාසයේ බීජිං වෙත පැමිණීමට සැලසුම් කර තිබුණ ද එක්සත් ජනපද ගුවන් සීමාවේ චීන ඔත්තු බැලූනයක් යැයි සැක කෙරෙන බැලුනයක් පියාසර කිරීම හේතුවෙන් එම සංචාරය කල් දැමුණි.
චීන විදේශ අමාත්‍ය Qin Gang සහ ජ්‍යෙෂ්ඨ චීන විදේශ ප්‍රතිපත්ති නිලධාරි වැන්ග් යී සමඟ රාජ්‍ය ලේකම්වරයා සාකච්ඡා කිරීමට නියමිතව තිබේ.
යුක්රේනයේ යුද්ධය, උසස් පරිගණක තාක්ෂණයන් පිළිබඳ වෙළඳ ආරවුල්, එක්සත් ජනපදයේ ෆෙන්ටැනයිල් මත්ද්‍රව්‍ය වසංගතය සහ චීන මානව හිමිකම් ක්‍රියාකලාපය යන සියල්ල ඇමරිකානු පාර්ශ්වය සාකච්ඡා කිරීමට අපේක්ෂා කරන මාතෘකා වේ.
චීන නිලධාරීන් බ්ලින්කන්ගේ සංචාරයට උණුසුම් ප්‍රතිචාර දක්වා නොමැති අතර, සබඳතා යහපත් කර ගැනීමට එක්සත් ජනපදය අවංක උත්සාහයක් දරන්නේ දැයි ප්‍රශ්න කරයි.
රාජ්‍ය ලේකම්වරයා චීන ජනාධිපති ෂී ජින්පින් හමුවන්නේ දැයි යන්න පැහැදිලි නැත.
බ්ලින්කන් 2021 ජනවාරියේ ජනාධිපති ජෝ බයිඩන් බලයට පත් වූ පසු චීනයට පැමිණි එක්සත් ජනපද රජයේ ඉහළම නිලධාරියා වේ.
