එක්සත් ජනපදය විසින් ශ්‍රී ලංකා ගුවන් හමුදාවට පරිත්‍යාග කළ Beechcraft King Air 360ER ගුවන් යානය ලබන සතියේ ශ්‍රී ලංකාවට ලැබීමට නියමිතව තිබේ.

නිවේදනයක් නිකුත් කරමින් ශ්‍රී ලංකාවේ එක්සත් ජනපද තානාපති කාර්යාලය පවසන්නේ මෙම ගුවන් යානය නිර්මාණය කර ඇත්තේ සෙවීම් සහ ගලවා ගැනීමේ මෙහෙයුම්, මත්ද්‍රව්‍ය ජාවාරම් මැඩලීමේ ශ්‍රී ලංකාවේ හැකියාව වැඩිදියුණු කිරීම සඳහා බවයි.

එක්සත් ජනපද ආරක්ෂක දෙපාර්තමේන්තුවේ සහයෝගී ධාරිතාව ගොඩනැගීමේ වැඩසටහන මගින් මේ සඳහා අරමුදල් සපයනු ලැබේ.

එය එක්සත් ජනපද-ශ්‍රී ලංකා ආරක්ෂක සහයෝගීතාව ශක්තිමත් කරන අතරම රටේ සමුද්‍ර නිරීක්ෂණ මෙහෙයුම් වැඩිදියුණු කරනු ඇත.

මෙම ඩොලර් මිලියන 19ක පමණ එක්සත් ජනපද රජයේ ප්‍රදානයට ශ්‍රී ලංකා ගුවන් හමුදාවට කිසිදු වියදමකින් තොරව සපයනු ලබන ගුවන් යානා සහ ආධාරක සේවා ද ඇතුළත් වේ.

Beechcraft King Air 360ER ශ්‍රී ලංකාවේ මුහුදු සීමාවේ මුර සංචාරයේ යෙදීමට සහ සමුද්‍රීය තර්ජනවලට මුහුණ දීමට ශ්‍රී ලංකාවට ඇති හැකියාව ඉහළ නැංවීම සඳහා අති නවීන තාක්ෂණයෙන් සමන්විත වේ.

පුහුණුවීම් කාලසීමාවකින් පසුව එය නිල වශයෙන් භාරදීම මෙම වසර අගදී සිදුකිරීමට අපේක්ෂා කෙරේ.

සහයෝගීතාවයේ කොටසක් ලෙස, ශ්‍රී ලංකා ගුවන් හමුදා සාමාජිකයන් ගුවන් යානා ක්‍රියාත්මක කිරීමට සහ නඩත්තු කිරීමට සම්පුර්ණයෙන්ම සන්නද්ධ බව සහතික කිරීම සඳහා එක්සත් ජනපද රජයේ නිලධාරීන් මාස තුනක පුහුණු වැඩසටහනක් පවත්වනු ඇත.

Beechcraft Textron Aviation විසින් 2022 අග භාගයේදී නිෂ්පාදනය නිම කරන ලද මෙම ගුවන් යානය, රේඩාර් සහ කැමරා වැනි අතිරේක වැඩිදියුණු කිරීම්වලින් සමන්විත වේ.

පසුගිය ජූනි සිට අගෝස්තු දක්වා, ශ්‍රී ලංකා ගුවන් හමුදා සාමාජිකයන් කැන්සාස් සහ ෆ්ලොරිඩා හි පුහුණුව සඳහා සහභාගී වී තිබිණි.

ශ්‍රී ලංකාවට පැමිණි පසු, ගුවන් යානය ත්‍රිකුණාමලයේ චීන වරායේ පිහිටි සමුද්‍ර මුර සංචාර 3 වැනි බලඝණයට සම්බන්ධ වීමට පෙර රත්මලාන ගුවන් හමුදා කඳවුරේදී වැඩිදුර පුහුණුවීම් සිදු කරනු ඇත.