January 24, 2025
ඊයේ උදෑසන බේරේ වැවේ මතුපිට පාවෙමින් තිබූ තාරාවන් සහ අළු පැස්තුඩුවන් රැසකගේ මළ සිරුරු දුසිම් ගණනක් හේතුවෙන් සැකයක් නිර්මාණය වී ඇත.
විශ්වාස කෙරෙන්නේ පිරිසිදු කිරීමේ අරමුණු සඳහා ජලයට රසායනික ද්‍රව්‍යයක් මුදාහැර ඇති බවත්, එය ජලජ පක්ෂීන්ට විෂවී ඇති බවත්ය.
ඊයේ සහ පෙරේදා බේරේ ජලයේ පාවෙමින් සිටි තාරාවන්ගේ සහ අළු පැස්තුඩුවන්ගේ මළ සිරුරු දුසිම් දෙකක් පමණ සොයාගන්නා ලද අතර, මෙම මරණවලට හේතුව පිළිබඳව බලධාරීන් සහ මහජනතාව ව්‍යාකූල වී ඇති බවක් පෙනෙන්නට තිබිණි.
කොළඹ මහනගර සභා කොමසාරිස් පාලිත නානායක්කාර ජනමාධ්‍ය වෙත පවසා ඇත්තේ, සිද්ධිය පිළිබඳව තමා ද දැන සිටින නමුත් කුරුල්ලන්ගේ මරණයට හේතුව කුමක්දැයි නොදන්නා බවයි.
තාරාවන්ට විෂ විය හැකි රසායනිකයක් නගර සභාවේ සේවකයන් විසින් ජලයට යොදා ඇතැයි යන කටකතාව කොමසාරිස්වරයා ප්‍රතික්ෂේප කර ඇත.
බේරේ වැවේ වගකීම ශ්‍රී ලංකා ඉඩම් ගොඩකිරීමේ සහ සංවර්ධනය කිරීමේ සංස්ථාව, ශ්‍රී ලංකා වරාය අධිකාරිය, නාගරික සංවර්ධන අධිකාරියට සහ කොළඹ මහනගර සභාව යන ආයතනවලට අයත් වන අතර, තම ආයතනය වැවේ කසළ එකතු කර බැහැර කිරීම සිදුකරන බව කොමසාරිස්වරයා සඳහන් කර තිබේ.
මේ අතර, නාගරික සංවර්ධන අධිකාරියේ ජ්‍යෙෂ්ඨ නිලධාරියකු පවසා ඇත්තේ, ඊයේ උදෑසන ගංගාරාම සීමාමාලකය අසල දූපතේ එල්ලෙන පාලමේ අලුත්වැඩියා කටයුතු සොයාබැලීමට එහි ගිය විට ප්‍රදේශය වටා තාරා මළකඳන් හමු වූ බවයි.
ප්‍රදේශයේ කම්කරුවන් දෙදෙනෙකුගෙන් කළ විමසීමකදී එම නිලධාරියාට පවසා ඇත්තේ, කොළඹ මහ නගර සභාවේ යැයි විශ්වාස කරන පිරිසක් බදාදා වැවට පැමිණ ජල පිරිපහදු කටයුතු සඳහා රසායනික ද්‍රව්‍යයක් මුදාහැර ඇති බවයි.
වනජීවී සංරක්ෂණ දෙපාර්තමේන්තුවේ බස්නාහිර පළාත් පුනරුත්ථාපන මධ්‍යස්ථානයේ ජ්‍යෙෂ්ඨ පශු වෛද්‍ය වෛද්‍ය සුහද ජයවර්ධන පවසා ඇත්තේ, තාරා මළකඳන් පිළිබඳව ඉහත බලධාරීන්ගෙන් කිසිවෙකු තවමත් තමන් දැනුවත් කර නොමැති බවයි.
බේරේ වැව පසුගිය සති කිහිපය තුළ මතභේදයට තුඩු දී තිබුණේ, ඇල්ගී ඝන තට්ටුවක් සහ කුණු කසළ හේතුවෙන් අප්‍රසන්න ගන්ධයක් පැතිරීම සම්බන්ද්ධයෙන් කිසිදු අධිකාරියක් විසින් සොයාබලා නොතිබූ බැවිනි.
