April 17, 2024
සිංහල හා දෙමළ අලුත් අවුරුදු උත්සවවලදී රසකැවිලි ඇතුළු විවිධ ආහාර වර්ග අනුභව කිරීමෙන් රුධිරයේ සීනි සහ කොලෙස්ටරෝල් මට්ටම ඉහළ යා හැකි බව සෞඛ්‍ය අමාත්‍යාංශයේ සායනික පෝෂණ රෙජිස්ට්‍රාර් වෛද්‍ය ජනක මාරසිංහ පවසයි.
උත්සව සමයේදී ආහාර පාන සම්බන්ධයෙන් ජනතාව වැඩි අවධානයක් යොමුකළ යුතු බව ද ඔහු පෙන්වා දෙයි.
“අලුත් අවුරුද්දේ හදන රසකැවිලි බොහොමයක් එළියට එන්නේ උත්සවයෙන් පසුවයි. සෑම නිවසකම රසකැවිලි ඇතුළු විවිධ ආහාර වර්ගවල සැලකිය යුතු එකතුවක් තියෙන නිසා ඉබේම මෙම ආහාර පරිභෝජනය වැඩිවෙනවා. අලුත් අවුරුදු ආහාර වැඩි සීනිවලින් සමන්විතයි. ඒ වගේම ඒවා සකස් කර ඇත්තේ අධික බර ඇති කරවන පිටි වර්ගවලින්. ඒවා ඔවුන්ගේ දියවැඩියා තත්ත්වයන් වැඩි කරනවා” යැයි වෛද්‍ය මාරසිංහ සඳහන් කරයි.
ඒ අනුව, අනවශ්‍ය සීනි සහ කොලෙස්ටරෝල් මට්ටම් රුධිර ප්‍රවාහයට එක්වීම වැළැක්වීමට ආහාර සැලැස්මක් අනුගමනය කිරීම වඩාත් වැදගත් වන බව ඔහු පෙන්වාදෙයි.
එබැවින් රුධිරයේ සීනි මට්ටම හඳුනා ගැනීම සඳහා අහඹු රුධිර සීනි පරීක්‍ෂාවක් කර වෛද්‍ය ප්‍රතිකාර අනුගමනය කරන ලෙස ද වෛද්‍ය මාරසිංහ ජනතාවගෙන් ඉල්ලා සිටියි.
