වැලිකඩ පොලිසියේ අත්අඩංගුවේ සිටියදී පසුගියදා තරුණයකු මරණයට පත්වීම සම්බන්ධයෙන් ශ්‍රී ලංකා නීතිඥ සංගමය දැඩි කනස්සල්ල පළකර ඇති අතර, සිද්ධිය සම්බන්ධයෙන් වහාම සහ අපක්ෂපාතී පරීක්ෂණයක් ඉල්ලා තිබේ.

ශ්‍රී ලංකා නීතිඥ සංගමය අප්‍රේල් 5 වැනි දින නිකුත් කළ නිවේදනයක දැක්වෙන්නේ, තරුණයා අත්අඩංගුවේ සිටියදී මාරාන්තික තුවාල ලබා ඇති බවට වාර්තා පළවීමත්, එම තුවාල තමන් විසින්ම සිදුකර ගත් ඒවා බවට ප්‍රකාශ කිරීමත් පිළිබඳව කනස්සල්ලට පත්ව ඇති බවයි.

නිසි ක්‍රියාපිළිවෙතක් සහතික කිරීමේ වැදගත්කම අවධාරණය කරන ශ්‍රී ලංකා නීතිඥ සංගමය, නැවත නැවත අත්අඩංගුවේ පසුවන පුද්ගලයන් මරණයට පත්වන සිදුවීම් නීතිය ක්‍රියාත්මක කිරීම සහ යුක්තිය පසිඳලීම කෙරෙහි මහජන විශ්වාසය දැඩි ලෙස අඩපණ කරන බවට අනතුරු අඟවයි.

එවැනි සිදුවීම් වැළැක්වීම සඳහා අර්ථවත් පියවර ගැනීමේදී බලධාරීන්ගේ මන්දගාමී ප්‍රතිචාරය ද ශ්‍රී ලංකා නීතිඥ සංගමය විවේචනය කරන අතර, මෙවැනි මරණ සම්බන්ධයෙන් කඩිනමින් පියවර ගැනීමේ ප්‍රතිපත්තියක් අනුගමනය කරන ලෙස ඉල්ලා සිටියි.

වගවීම වැඩි දියුණුකිරීම සහ අපයෝජනය වැළැක්වීම සඳහා පොලිස් දෙපාර්තමේන්තුව තුළ දැනුම වර්ධනය කිරීමේ පියවර සඳහා සහාය ලබාදෙන බවද ශ්‍රී ලංකා නීතිඥ සංගමය සඳහන් කරයි.

මේ අතර, නාවල ප්‍රදේශයේ නිවසකට ඇතුළු වූ බවට චෝදනා කරමින් සැකකරු අප්‍රේල් 1 වන දින අත්අඩංගුවට ගැනීමෙන් පසු සිදු වූ මෙම මරණය සම්බන්ධයෙන් අපරාධ පරීක්ෂණ දෙපාර්තමේන්තුව (CID) පරීක්ෂණයක් ආරම්භ කර තිබේ.

පොලිස් මාධ්‍ය ඒකකයට අනුව, වැඩබලන පොලිස්පතිවරයාගේ නියෝගය පරිදි, අපරාධ පරීක්ෂණ දෙපාර්තමේන්තුව අප්‍රේල් 4 වන දින අදාළ නිලධාරීන්ගේ හැසිරීම පිළිබඳව විමර්ශනය කිරීම ආරම්භ කර තිබේ.