පරාටේ නීතිය හරහා ශ්‍රී ලංකාවේ බැංකු විසින් පුද්ගලයන් 557 දෙනකුගෙන් 2023 නොවැම්බර් දක්වා ලැබිය යුතු ණය රුපියල් බිලියන 38ක් අයකරගෙන ඇති අතර එය 03 වැනි අදියරේ දුර්වල ණය වලින් 2.7% ක් පමණක් බව ශ්‍රී ලංකා මහ බැංකුවේ අධිපති ආචාර්ය නන්දලාල් වීරසිංහ පැවැසීය.

පසුගිය සිකුරාදා පැවති මූල්‍ය ස්ථායිතා සමාලෝචනයේදී ජනමාධ්‍ය වෙත අදහස් දක්වමින් ආචාර්ය වීරසිංහ පැවසුවේ, පරාටේ නීතිය හරහා බැංකු ක්ෂේත්‍රය විසින් 2023 නොවැම්බර් දක්වා පුද්ගලයන් 557 දෙනකුගෙන් අයකර ගත් රුපියල් බිලියන 38ක ණය බැංකු අංශය විසින් සපයන ලද මුළු ණයවලින් 0.4%ක් බවයි.

2023 නොවැම්බර් වන විට බැංකු ක්ෂේත්‍රයේ 03 වැනි අදියරේ අඩාළ වූ ණය ප්‍රමාණය 13%ක් පමණ වන බවත්, එහි වටිනාකම රුපියල් ට්‍රිලියන 1.4ක් වන අතර, බැංකු විසින් එයින් 2.7% ක් පරාටේ නීතිය හරහා අයකර ගෙන ඇති බවත් හෙතෙම පෙන්වාදුන්නේය.

එපමණක් නොව බැංකු ක්‍ෂේත්‍රය විසින් තැන්පත්කරුවන්ගේ මුදල් හරහා විවිධ ක්ෂේත්‍ර සඳහා ණය ලබාදෙන බැවින්, බැංකු ක්ෂේත්‍රයේ තැන්පත්කරුවන්ගේ මුදල් ආරක්‍ෂා කිරීමට පරාටේ නීතිය අවශ්‍ය බවද මහ බැංකු අධිපතිවරයා පැවැසීය.

“ඉතින් ණය ආපසු නොගෙවන්නේ නම් බැංකුවට වඩා තැන්පත්කරුටයි විශාලතම පාඩුව සිදුවන්නේ,” ඔහු පැවසීය.

පරාටේ නීතිය දුර්වල කිරීමට උත්සාහ කරන ණය නොගෙවන්නන්ගේ කණ්ඩායමක් ලෙස හැඳින්වූ පිරිසට ප්‍රතිචාර දක්වමින් ආචාර්ය වීරසිංහ පැවසුවේ, බැංකු අංශයේ වගකීම්වලින් 81% තැන්පතු වන අතර, 07% ක් පමණක් කොටස් හිමියන්ගේ ප්‍රාග්ධනය වන බැවින් තැන්පත්කරුවන් ණය අයකර ගැනීම හරහා ඒවා ආපසු ගෙවීමට බැඳී සිටින බවයි. .

බැංකුවලට ණය ආපසු අයකර ගැනීමට නොහැකි වුවහොත්, ණය ලබාදීමට මැලිවන බවත්, එය ආර්ථිකයට ප්‍රධාන වශයෙන් බලපානු ඇත්තේ ආර්ථිකය වර්ධනය වීමට අවශ්‍ය ණය ලබාදීමේ හැකියාව බැංකුවලට තිබිය යුතු නිසා බවත් ඔහු පැවැසීය.

“බැංකු ණය ලබාදෙන්නේ නම් ආර්ථිකයේ මෙහෙයුම් සිද්ධ වෙයි. බැංකු අවදානමක් ගනිමින් කෙටි කාලීන තැන්පතු හරහා දිගු කාලීන ණය ලබා දෙනවා” යැයි ඔහු පැවැසුවේය.

නොවැම්බරයේ සත්පුද්ගල ශ්‍රේෂ්ඨාධිකරණ විනිසුරු මඩුල්ලක් ඒකමතිකව තීරණය කළේ, සැබෑ ණය ගැණුම්කරුවකු පමණක් නොව සැබෑ ණයගැතියාට ලබාදුන් ණය සඳහා තුන්වැනි පාර්ශ්වයක් විසින් බැංකුවකට උකස් කර ඇති දේපළ වෙන්දේසියේ විකුණා නොගෙවූ ණය සහ එහි පොළිය ආපසු අයකරගත හැකි බවයි.

මෙම තීරණය ණයගැතියාට වඩාත් නම්‍යශීලී බවක් ලබාදීම සඳහා පරාටේ නීතිය සංශෝධනය කිරීම සඳහා වන ණයගැතියන් නියෝජනය කරන බව කියන ඇතැම් කණ්ඩායම් අතර විවාදයක් ඇති විය.