බංගලාදේශයේ ජාතියේ පියා වන ෂීක් මුජිබර් රහ්මාන්ගේ ඝාතකයා වන නූර් චෞද්රි, කැනඩාවේ නිදහසේ ජීවත් වන බව නව වාර්තා චිත්‍රපටයකින් කරන ලද හෙළිදරව්වෙන් පසු ඔහු පිටුවහල් කරන ලෙස බංග්ලාදේශය කැනඩාවෙන් නව ඉල්ලීමක් කිරීමට සුදානම් වන බව වාර්තා වේ.

ANI පුවත් සේවය වෙත අදහස් දක්වමින් කැනඩාවේ බංග්ලාදේශ මහ කොමසාරිස් ඛලිලුර් රහ්මාන් (Khalilur Rahman) පැවසුවේ, “අපි මෙහි නිශ්ශබ්දව වාඩි වී නොසිටින අතර CBC වාර්තා චිත්‍රපටයේ නව සාක්ෂියෙන් පසුව, අපි ඔහු ඉක්මනින් පිටුවහල් කරන ලෙස කැනේඩියානු රජයට නව ඉල්ලීමක් කරන්නෙමු” යනුවෙනි.

චෞද්රි කැනඩාවට ඇතුළු වූයේ මීට වසර 28 කට පමණ පෙර 1996 දී බව රහ්මාන් හෙළි කළේය.

බරපතල අපරාධයකට වරදකරු වූ මිනීමරුවෙකු වුවද, ඔහු කැනඩාවේ නිදහසේ ජීවත් වේ.

ඔහු පිටුවහල් කිරීමට පහසුකම් සැලසීම සඳහා බංගලාදේශ රජය විවිධ මාර්ග සොයාබලමින් සිටී.

“අපි හැකි සෑම මාර්ගයක්ම ගවේෂණය කරමින් සිටින අතර අධිකරණ තීන්දුවට මුහුණ දීම සඳහා ඔහුව බංග්ලාදේශයට ගෙන්වා ගන්නා ලෙස කැනඩා රජයෙන් ඉල්ලා සිටිමු. මෙම අධිකරණ ක්‍රියාවලිය විනිවිදභාවයෙන් හා බියෙන් තොර වී ඇත. විත්තිකරුවන්ට ඔවුන්ගේ නිර්දෝෂීභාවය ඉදිරිපත් කිරීමට ඕනෑ තරම් අවස්ථාවන් සලසා දී ඇති බව ජාත්‍යන්තර ක්ෂමා ආයතනය සහතික කර ඇත, ”රහ්මාන් පැවසීය.