ශ්‍රී ලංකාවේ අයහපත් කාලගුණයෙන් මියගිය සංඛ්‍යාව 26 දක්වා ඉහළ ගොස් ඇති බව ආරක්ෂක රාජ්‍ය ඇමැති ප්‍රමිත බණ්ඩාර තෙන්නකෝන් පාර්ලිමේන්තුවේදී අනාවරණය කළේය.

පවතින අයහපත් කාලගුණික තත්ත්වය හේතුවෙන් පවුල් 33,422ක පුද්ගලයින් 130,021 දෙනෙකු පීඩාවට පත්ව සිටින බව වත්මන් තත්ත්වය පිළිබඳව සභාව දැනුවත් කරමින් රාජ්‍ය ඇමැතිවරයා සඳහන් කළේය.

“මේ වන විට අයහපත් කාලගුණය හේතුවෙන් මරණ 26ක් සහ තුවාල ලැබූ සංඛ්‍යාව 41ක් වාර්තා වී තිබෙනවා. මීට අමතරව, පවුල් 2,368 ක පුද්ගලයින් 9,248 දෙනෙකු ආරක්ෂිත මධ්‍යස්ථාන 116 ක රඳවා තිබෙනවා.

මෝසම් කාලයට පෙර ගංවතුර ඇතිවීමට සූදානමක් පවතින බවට අනාවැකි පළනොකිරීම සම්බන්ධයෙන් මන්ත්‍රීවරුන්ගෙන් එල්ල කරන චෝදනා ප්‍රතික්ෂේප කළ රාජ්‍ය ඇමැතිවරයා, සති කිහිපයක සිට ග්‍රාමීය කමිටු සහභාගිත්වයෙන් ප්‍රජා මට්ටමින් සූදානම් වෙමින් පැවැති බව අවධාරණය කළේය.

කාලගුණ විද්‍යා දෙපාර්තමේන්තුවට කාලගුණය නිවැරදිව පුරෝකථනය කිරීමට ඇති හැකියාව පිළිබඳ විවේචනවලට පිළිතුරු ලබාදෙමින් කරමින් රාජ්‍ය ඇමැති තෙන්නකෝන් ශ්‍රී ලංකාවේ තාක්ෂණික හැකියාවන් වසර 10 සිට 15 දක්වා පසුගාමී බව පිළිගත්තේය.

“අපි තාක්ෂණික වශයෙන් පසුගාමී බව මම පිළිගන්නවා. කෙසේ වෙතත්, පසුගිය වසර කිහිපය තුළ ආර්ථික දුෂ්කරතා මධ්‍යයේ වුවද, කාලගුණ විද්‍යා දෙපාර්තමේන්තුවේ තාක්ෂණික හැකියාවන් වැඩිදියුණු කිරීමේ ව්‍යාපෘතියක් නොසලකා හැර නැහැ ”ඔහු වැඩිදුරටත් පැවැසීය.

මේ අතර අයහපත් කාලගුණයෙන් විපතට පත්වූවන්ට සහන සැලසීම සඳහා ජනාධිපති රනිල් වික්‍රමසිංහ ඉදිරිපත් කළ යෝජනාවට කැබිනට් මණ්ඩල අනුමැතිය හිමි වූ බව හෙතෙම ප්‍රකාශ කළේය.

විපතට පත්වූවන් සඳහා ආහාර වෙනුවන් වෙන්කරන මුදල් වැඩිකිරීම සම්බන්ධයෙන් විපක්ෂ නායක සජිත් ප්‍රේමදාස ඇසූ ප්‍රශ්නවලට පිළිතුරු දෙමින් රාජ්‍ය ඇමැතිවරයා තහවුරු කළේ මේ සඳහා රජය මේ වන විටත් අවශ්‍ය අනුමැතිය ලබාගෙන ඇති බවයි.