නිල ඇඳුමින් සැරසුණු පොලිස් නිලධාරීන්ගේ රාජකාරියට බාධා කිරීමේ සිද්ධියක් සම්බන්ධයෙන් පුද්ගලයන් හත් දෙනෙකු නිලාවේලි පොලිසිය අත්අඩංගුවට ගෙන තිබේ.

නිලාවේලි පොලිස් ස්ථානයේ නිලධාරීන් දෙදෙනෙක් රථවාහන වරදක් සම්බන්ධයෙන් නීතිය ක්‍රියාත්මක කරමින් සිටින අතරතුර යම් පුද්ගල කණ්ඩායමක් නිලධාරීන් දෙදෙනාගේ එම රාජකාරියට නිලාවේලි සිත්තිවිනයාගර් කෝවිල ඉදිරිපිට මාර්ගයේදී බාධා කරමින් පහරදීමක් සිදුකළ සිදුවීමක් පසුගිය 31 වැනි දින දහවල් වාර්තා වී තිබිණි.

නිලාවේලි පොලිස් ස්ථානය මගින් එම සැකකරුවන් අත්අඩංගුවට ගැනීමට ක්‍රියාත්මක කළ විමර්ශනයට අදාළව මේ වන විට සැකකරුවන් 07 දෙනෙකු අත්අඩංගුවට ඇති අතර එම පිරිස අතරට කාන්තාවක් සහ සිදුවීම වීඩියෝගත කළ පුද්ගලයාද ඇතුළත් බව පොලිසිය කියයි.

සිද්ධියට සම්බන්ධ ප්‍රධාන සැකකරු මාර්තු 31 වන දින අත්අඩංගුවට ගන්නා ලදී.

ඔහු 2025 අප්‍රේල් 3 වැනි දින දක්වා රක්ෂිත බන්ධනාගාර ගත කිරීමට නියෝග කෙරිණි.

ඔවුන් පැමිණි ත්‍රී රෝද රථයක් සහ රථවාහන වරදට මුල්වූ යතුරුපැදිය ද නිලාවේලි පොලිස් ස්ථානය භාරයට ගෙන තිබේ.

පුද්ගලයන් 10 දෙනෙකුගෙන් යුත් කණ්ඩායමක් පොලිස් නිලධාරීන්ගේ රාජකාරියට බාධා කරමින් පසුව ඔවුන්ට පහර දෙන අයුරු දක්නට ලැබුණු බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී බුද්ධික මනතුංග පැවසීය.

ප්‍රදේශයෙන් පලා ගිය අනෙක් සැකකරුවන් ඊයේ (අප්‍රේල් 1) අත්අඩංගුවට ගත් බව පොලිසිය පැවසීය.

වයස අවුරුදු 35ත් 45ත් අතර පසුවන සැකකරුවන් නිලාවේලි ප්‍රදේශයේ පදිංචිකරුවන්ය.

තවත් සැකකරුවන් දෙදෙනෙකු හඳුනාගෙන ඇති අතර, පොලිසිය වැඩිදුර පරීක්ෂණ පවත්වයි.