සූදු සහ අන්තර්ජාල කැසිනෝ සඳහා නියාමන ආයතනයක් පිහිටුවීම සම්බන්ධයෙන් මුදල් අමාත්‍යාංශයෙන් කිසිදු පනත් කෙටුම්පතක් හෝ පවතින නීති සඳහා සංශෝධනයක් තවමත් අධිකරණ අමාත්‍යාංශයට ඉදිරිපත් කර නොමැති බව අධිකරණ අමාත්‍ය හර්ෂණ නානායක්කාර පවසා තිබේ.

පසුගිය වසර කිහිපය තුළ සූදු කර්මාන්තයෙන් සහ අන්තර්ජාල ක්‍රීඩා අඩවිවලින් බදු ආදායම අහිමි වීම හේතුවෙන් රාජ්‍ය මුදල් පිළිබඳ පාර්ලිමේන්තු කාරක සභාව සූදු කර්මාන්තය සඳහා නියාමන ආයතනයක් පිහිටුවීමට නැවත නැවතත් ඉල්ලීම් කර තිබිණි.

ජනාධිපති රනිල් වික්‍රමසිංහ යටතේ පැවති පසුගිය රජය එවැනි අධිකාරියක් පිහිටුවීමට පොරොන්දු වූ නමුත් එම රජයේ ධුර කාලය අවසන් වන විට එය කිරීමට අපොහොසත් වී තිබිණි.

පසුගිය අඟහරුවාදා (18) පැවති රාජ්‍ය මුදල් පිළිබඳ පාර්ලිමේන්තු කාරක සභා රැස්වීමේදී ඔට්ටු ඇල්ලීම, සූදු, දුම්කොළ සහ මත්පැන් කර්මාන්ත සඳහා යෝජිත ආදායම් බදු අනුපාතය 40% සිට 45% දක්වා වැඩි කිරීම පිළිබඳව ද කණස්සල්ල පළ කර තිබේ.

අමාත්‍යාංශය කැසිනෝ නියාමන ආයතනයක් පිහිටුවීමට අපොහොසත් වීම ද එහිදී ඉස්මතු කෙරුණු කරුණු අතර විය.

මීට අමතරව, පසුගිය වසර පහ තුළ කැසිනෝ ආදායම පිළිබඳ ඉල්ලා සිටි දත්ත දේශීය ආදායම් දෙපාර්තමේන්තුව (IRD) විසින් ලබා නොදීම සම්බන්ධයෙන් රාජ්‍ය මුදල් පිළිබඳ පාර්ලිමේන්තු කාරක සභා සභාපති ආචාර්ය හර්ෂ ද සිල්වා අතෘප්තිය පළ කළේය.