November 14, 2023
2023 ICC පිරිමි ක්‍රිකට් ලෝක කුසලානයේදී ජාතික කණ්ඩායම තේරීමේ ක්‍රියාවලිය පිළිබඳව හිටපු ක්‍රිකට් ක්‍රීඩක අරවින්ද ද සිල්වා කනස්සල්ල පළකර තිබේ.
“Truth with Chamuditha” වැඩසටහන සමග එක්වෙමින් ඔහු මෙම අදහස් පළකර ඇත.
“ලෝක කුසලානයක් සම්බන්ධයෙන් ගත් කල, ජ්‍යෙෂ්ඨත්වය ඉතා වැදගත් වෙනවා. ජ්‍යෙෂ්ඨ ක්‍රීඩකයන් තේරීම්වලට ඇතුළත් නොකිරීමේ ප්‍රතිපත්තියක් තිබුණත් එය වෙනස් වෙනවා නම්, ලෝක කුසලානය වැනි තරගාවලියකදී ඔවුන්ගේ අත්දැකීම් අත්‍යවශ්‍ය බැවින්, ඔවුන් අවම වශයෙන් මාස 06කට පෙර කණ්ඩායමට ගෙන ඒමට කටයුතු කළ යුතුව තිබුණා” යැයි ද ඔහු සඳහන් කරයි.
ලෝක කුසලාන තරගාවලියේදී සිදුකරන ලද ඇතැම් වෙනස්කම් නිතර සිදු වූ බවත්, ලෝක කුසලානය වැනි තරගාවලියකට මුහුණ දීමට අත්දැකීම් අවශ්‍ය බැවින් පළපුරුද්දක් නොමැති තරුණ ක්‍රීඩකයන් මුල් තැනට ගෙන ඇති බවත්, ඔහු පවසයි.
හිටපු ක්‍රිකට් ක්‍රීඩක සහ ශ්‍රී ලංකා ක්‍රිකට් කණ්ඩායමේ උපදේශක මහේල ජයවර්ධන ක්‍රිකට් ක්‍රීඩාව පිළිබඳ විශාල දැනුමක් සහ පළපුරුද්දක් ඇති පුද්ගලයෙකු බැවින් ඔහු කණ්ඩායම සමඟ වැඩි කාලයක් ගත කළ යුතුව තිබූ බව අරවින්ද ද සිල්වා සඳහන් කර ඇත.
මහේල ජයවර්ධන කණ්ඩායම සමඟ ගත කළ කාලය ප්‍රමාණවත් නොවන බවත්, ඔවුන්ට මඟ පෙන්වීම සඳහා කණ්ඩායම සමඟ වැඩිපුර රැඳී සිටිය යුතුව තිබූ බවත්, තමාගේ අදහස බව අරවින්ද වැඩිදුරටත් සඳහන් කරයි.
