අශෝක රන්වල ඉල්ලා අස්වීමෙන් පුරප්පාඩු වූ කථානායක ධුරය සඳහා නව කථානායකවරයකු පත් කිරීම බොහෝ දුරට දෙසැම්බර් 17 වැනිදා සිදු විය හැකි බව දේශපාලන නිරීක්ෂකයන් ප්‍රකාශ කර තිබේ.

පාර්ලිමේන්තුව දෙසැම්බර් 17 වැනිදා රැස්වීමට නියමිත අතර, නව කථානායකවරයකු පත්කිරීමට අදාළ නාමයෝජනා එදිනට ඉදිරිපත් කිරීමට නියමිතය.

මේ අතර, මහාචාර්ය ප්‍රතිභා මහානාමහේවා කියා සිටියේ ශ්‍රී ලංකා පාර්ලිමේන්තු ඉතිහාසයේ කථානායකවරයකු ඉල්ලා අස්වූ පළමු අවස්ථාව මෙය බවයි.

ඉල්ලා අස්වීමේ දැන්වීම කථානායකවරයා විසින් පාර්ලිමේන්තු මහලේකම්වරයාට හෝ ජනාධිපතිවරයාට ඉදිරිපත් කළ හැකි බව ඔහු පැහැදිලි කළේය.

ඉල්ලා අස්වීමේ ලිපිය ජනාධිපතිවරයාට ලැබුණු පසු එය පිළිගැනීම සම්බන්ධයෙන් ජනාධිපතිවරයාට තීරණයක් ගත හැකියි.

කථානායකවරයාගේ ඉල්ලා අස්වීම ජනාධිපතිවරයා පිළිගන්නේ නම්, පාර්ලිමේන්තුව විසින් නව කථානායකවරයකු තෝරා පත්කර ගත යුතුය.

මෙම පත් කිරීම සාමාන්‍ය නීතියට අනුව ඡන්දයකින් හෝ නාමයෝජනා මගින් සිදු කළ හැකි බව මහාචාර්ය මහානාමහේවා මහතා වැඩිදුරටත් පැවසීය.