June 10, 2024
තරාතිරම නොබලා ඕනෑම සිවිල් වැසියකු හමුදා රෝහලට ඇතුළත් කළ හැකි බව යුද හමුදා මාධ්‍ය ප්‍රකාශක මේජර් ජෙනරාල් රසික කුමාර පවසයි.
මහනුවර දිස්ත්‍රික් පාර්ලිමේන්තු මන්ත්‍රී මහින්දානන්ද අලුත්ගමගේ සමඟ ඇති වූ ගැටුමකින් ශ්‍රී ලංකා පොදුජන පෙරමුණේ මන්ත්‍රී ගුණතිලක රාජපක්ෂ හමුදා රෝහලට ඇතුළත් කිරීම සම්බන්ධයෙන් ප්‍රතිචාර දක්වමින් ඔහු මේ බව ප්‍රකාශ කර ඇත.
ජූනි 03 වැනි දින ජනාධිපති ලේකම් කාර්යාලයේදී ඇති වූ ආරවුලකින් පසු ගුණතිලක රාජපක්ෂ හමුදා රෝහලට ඇතුළත් කර තිබිණි.
තුවාල ලැබූ මන්ත්‍රීවරයාට ප්‍රතිකාර ලබාදෙන ලෙස සේනාධිනායකයා ලෙස ජනාධිපති රනිල් වික්‍රමසිංහ යුද හමුදාවට උපදෙස් දිය හැකි බව මේජර් ජෙනරාල්වරයා පෙන්වා දී තිබේ.
අලුත්ගමගේ මන්ත්‍රීවරයාගේ පහරදීමකින් තම පියාගේ දකුණු පාදය දණහිසට ඉහළින් කැඩී පැය හතරක ශල්‍යකර්මයකට භාජනය කළ බව තුවාල ලැබූ මන්ත්‍රීවරයාගේ පුත්‍රයා ප්‍රකාශ කර ඇතැයි වාර්තා වේ.
