September 9, 2024
ජාතික ජන බලවේගයේ නායක අනුර කුමාර දිසානායක පසුගියදා යාපනයේ කළ සංචාරයකදී උතුරේ ජනතාවට තර්ජනාත්මක ප්‍රකාශයන් සිදුකළ බවට චෝදනා එල්ල වූ තම ප්‍රකාශය සම්බන්ධයෙන් පවතින මතභේදයට ප්‍රතිචාර දක්වා තිබේ.
අනුර දිසානායක පවසන්නේ, දෙමළ ජාතික සන්ධානයේ ප්‍රකාශක පාර්ලිමේන්තු මන්ත්‍රී එම්.ඒ. සුමන්තිරන් මේ වනවිටත් රනිල් වික්‍රමසිංහගේ ප්‍රකාශයට නිවැරදි ප්‍රතිචාරය සපයා ඇති බවයි.
“සුමන්තිරන් මන්ත්‍රීවරයා මේ වන විටත් නිවැරදි පිළිතුර දී ඇති බැවින් රනිල් වික්‍රමසිංහ මහතාට පිළිතුරු දීමට මට අවශ්‍ය නැහැ. ජාතිවාදය අවුස්සන්න උත්සාහ කළාට සමාව ගත යුත්තේ රනිල්’’ දිසානායක කීවේ තම ප්‍රකාශය ආරක්‍ෂා කරමින් චෝදනාව නැවත ජනාධිපතිවරයා වෙත හරවමිනි.
අනුර දිසානායකගේ මෙම ප්‍රතිචාරය මාලිමාවේ නායකයා උතුරේ ජනතාවට තර්ජනය කරන බවට චෝදනා කරන බවත්, ඒ වෙනුවෙන් ඔහු උතුරේ ජනතාවගෙන් සමාව ගත යුතු බවටත් ජනාධිපති වික්‍රමසිංහ ප්‍රකාශ කිරීමෙන් පසුවය.
කෙසේවෙතත්, සුමන්තිරන් මීට පෙර දිසානායක වෙනුවෙන් පෙනීසිටිමින් ප්‍රකාශ කළේ, අනුර දිසානායක අදාළ ප්‍රකාශ ජාතිවාදී චේතනාවෙන් සිදු නොකළ බවත්, රට තුළ ජාතිවාදය තුරන් කිරීමට කැපවිය යුතු බව අනුර දිසානායක දන්නා බවත්ය.
