වසරක් තුළ ඖෂධවල ගුණාත්මක අසාර්ථකවීම් වැඩිම අවස්ථා ගණනක් වාර්තා කරමින් 2023 වසරේ මේ දක්වා ඖෂධ 100ක් තත්ත්ව පරීක්ෂණවලින් අසමත් වී ඇති බව සෞඛ්‍ය අමාත්‍යංශයේ වෛද්‍ය සැපයුම් අංශයේ දත්ත අනාවරණය කරයි.

තත්ත්ව පරීක්ෂණවලින් අසමත් වූ ඖෂධවලින් 52ක් පමණ ඉන්දියාවේ නිෂ්පාදනය කර ඇති ඖෂධ වන අතර ඖෂධ 40ක් දේශීයව නිෂ්පාදනය කර ඇති ඒවාය.

අනෙක් ඖෂධ චීනය, පාකිස්ථානය, ජපානය සහ බංග්ලාදේශය වැනි රටවල නිෂ්පාදන කර තිබේ.

තත්ත්ව පරීක්‍ෂණවලින් අසමත් වී ඇති බවට හඳුනාගත් ඖෂධවලින් සමහරක් ඉවත්කර ගෙන ඇති අතර, ඇතැම් ඖෂධ රඳවාතැබීමට හෝ අත්හිටුවීමට කටයුතු කර ඇත.

මීට අමතරව, Flucloxacillin Cap නමැති ඖෂධ කාණ්ඩ 35ක් මැයි මාසයේදී ඉවත්කර ඇති අතර, එය කාණ්ඩ ගණන අනුව 2017 වසරේ සිට මේ දක්වා ඉවත දැමුණු ඉහළම කාණ්ඩ අගය වාර්තා කරයි.

මෙම ඖෂධය නිෂ්පාදනය කර ඇත්තේ රත්මලානේ පිහිටි රාජ්‍ය ඖෂධ නිෂ්පාදන නීතිගත සංස්ථාව විසිනි.

සෞඛ්‍ය අමාත්‍යංශයට අනුව, 2017 වසරේ සිට මේ දක්වා කාලයේ ඖෂධ තත්ත්ව අසමත්වීම් 600කට ආසන්න සංඛ්‍යාවක් වාර්තා වී ඇත.

දෙවන වැඩිම තත්ත්ව අසමත්වීම් සංඛ්‍යාව 96ක් ලෙස 2019දී වාර්තා වී ඇති අතර 2022 වසරේදී ඖෂධ 86ක් තත්ත්ව පරීක්ෂණ අසමත් වී තිබේ.

ඖෂධවල ගුණාත්මක ගැටලු හේතුවෙන් 2023 දී සංකූලතා සහ මරණ කිහිපයක්ද වාර්තා විය.