ශ්‍රී ලංකාවේ වීසා අයදුම්පත් සැකසීමේ කොන්ත්‍රාත්තුව GBS Technology Services සහ IVS Global-FZCO සහ VF Worldwide Holdings Ltd යන සමාගම් වෙත ප්‍රදානය කිරීම අවලංගු කරන ලෙස ඉල්ලා ශ්‍රේෂ්ඨාධිකරණයට ඊයේ පෙත්සමක් ඉදිරිපත් වී තිබේ.

එම පෙත්සම ඉදිරිපත් කර තිබුණේ ජෛව විවිධත්ව විද්‍යාඥ ආචාර්ය රොහාන් පෙතියාගොඩ සහ ලංකා වාණිජ මණ්ඩලයේ හිටපු සභාපති චන්ද්‍රා ජයරත්න විසිනි.

ඔවුන්ගේ පෙත්සම බොහෝ දුරට පදනම් වී ඇත්තේ රාජ්‍ය මුදල් කාරක සභා සභාපති ආචාර්ය හර්ෂ ද සිල්වා විසින් ඉදිරිපත් කළ ලේඛන මතය.

අනවශ්‍ය යෝජනාවක් මත පදනම් වූ මෙම ගනුදෙනුව රජයේ ප්‍රසම්පාදන මාර්ගෝපදේශ උල්ලංඝනය කරන බවත් එමගින් ඉදිරි වසර 16 තුළ ඩොලර් මිලියන 400ක පමණ ආදායමක් රාජ්‍යයට අහිමි කරන බවත් ඔවුන් චෝදනා කර තිබේ.

මේ අතර ආචාර්ය ද සිල්වා විගණකාධිපතිවරයාගෙන් ඉල්ලා ඇත්තේ සම්පූර්ණ ගනුදෙනුව වෝහාරික විගණනයකට ලක් කරන ලෙසයි.

ආචාර්ය පෙතියාගොඩ සහ ජයරත්නගේ නඩුව මේ සම්බන්ධයෙන් රජයට එරෙහිව දියත් කරන ලද තුන්වැනි නඩුවයි.

ශ්‍රී ලංකා අභ්‍යන්තර සංචාරක ක්‍රියාකරුවන්ගේ සංගමය, ශ්‍රී ලංකා හෝටල් සංගමය, සංචාරක කුඩා හා මධ්‍ය පරිමාණ ව්‍යවසායකයන්ගේ සංගමය, ශ්‍රී ලංකා වෘත්තීය සම්මන්ත්‍රණ ප්‍රදර්ශන සංවිධායකයන්ගේ සංගමය, ශ්‍රී ලංකා සත්කාරක උපාධිධාරීන්ගේ සංගමය සහ සංචාරක සන්ධානය යන සංගම් විසින් ශ්‍රී ලංකාවේ සංචාරක ව්‍යාපාරයට බරපතළ හානි සිදුවී ඇති බව සඳහන් කරමින් අදාළ ගනුදෙනුව නතර කරන ලෙස පසුගිය සතියේ ශ්‍රේෂ්ඨාධිකරණයට ඒකාබද්ධව පෙත්සමක් ඉදිරිපත් කර තිබිණි.

විපක්ෂයේ පාර්ලිමේන්තු මන්ත්‍රීවරුන් වන පාඨලී චම්පික රණවක, එම් ඒ සුමන්තිරන් සහ රවුෆ් හකීම් ද මෙම කොන්ත්‍රාත්තුව බල රහිත කරන ලෙස ඉල්ලා ශ්‍රේෂ්ඨාධිකරණයට වෙන වෙනම පෙත්සමක් ඉදිරිපත් කර තිබේ.

මෙම නඩු අගෝස්තු 2 වැනිදා කැඳවීමට නියමිතය.