සෝඩියම් වැල්ප්‍රොයිට් නම් ඖෂධයේ මිලිග්‍රෑම් 100 පෙති සඳහා “ව්‍යාජ” ලියාපදිංචියක් සොයාගැනීමත් සමඟ ජාතික ඖෂධ නියාමන අධිකාරිය විසින් අපරාධ පරීක්ෂණ දෙපාර්තමේන්තුවට (CID) ඒ පිළිබඳව පැමිණිලි කර, එම දේශීය නිෂ්පාදකයා විසින් සිදුකෙරෙන මෙම අපස්මාර නාශක ඖෂධය නිෂ්පාදනය කිරීම නවතා දමා දැමීමට පියවර ගෙන තිබේ.

අදාළ “ව්‍යාජ” ලියාපදිංචියේ පිටපත සොයාගැනීමට හැකි වී ඇත්තේ සෞඛ්‍ය අමාත්‍යංශය විසින් යොමුකරන ලද ලිපිලේඛන අතරින් බව ද වාර්තා වේ.

එහෙත් ව්‍යාජ ලේඛනයේ මුල් ලේඛනය සම්බන්ධයෙන් තවමත් කරුණු හෙළි වී නැත.

සිද්ධියට අදාළව නම කියැවී ඇති නිව් ජෙන් ලංකා හෙල්ත්කෙයාර් (පෞද්ගලික) සමාගම ද මෙය උගුලක් බව පවසමින් පරාධ පරීක්ෂණ දෙපාර්තමේන්තුවට පැමිණිලි කර තිබේ.

මේ සම්බන්ධයෙන් විමර්ශනය කරන ලෙස සෞඛ්‍ය අමාත්‍යංශයේ වෛද්‍ය සැපයුම් අංශය විසින් ද පොලිසියට වෙනම දන්වා ඇත.

ව්‍යාජ ඉමියුනොග්ලොබියුලින් වංචාවට ජාතික ඖෂධ නියාමන අධිකාරියේ ඉහළ නිලධාරීන් සහ සෞඛ්‍ය අමාත්‍යංශයේ නිලධාරීන් සමඟ ආරවුලක සිටින වෛද්‍ය සැපයුම් අංශය මෑතකදී ලේඛන විශාල ප්‍රමාණයක් ඖෂධ නියාමන අධිකාරිය වෙත යොමුකර ඒවා සත්‍යාපනය කරන ලෙස ඉල්ලා සිටියේය.

“ගැස්ට්‍රෝ-ප්‍රතිරෝධී සෝඩියම් වැල්ප්‍රොයිට් 100mg පෙති ” සඳහා නිව් ජෙන් ලංකා වෙත නිකුත් කළ බව කියන තනි ලියාපදිංචි සහතිකයක විෂමතාව ඖෂධ නියාමන අධිකාරියේ සේවකයකු විසින් හඳුනාගැනීමෙන් පසු නවතම මතභේදය ඇති වී තිබේ.

මෙම සහතිකයට අදාළ වෛද්‍ය සැපයුම් අංශ ආවරණ ලිපියේ පවා මිලදී ගැනීමේ නියෝගයක් නිකුත් කර ඇති බව සඳහන් කර තිබේ.

කෙසේවෙතත්, ඖෂධ නියාමන අධිකාරිය සොයාගෙන ඇත්තේ, නිව් ජෙන් ලංකා සතුව වලංගු බලපත්‍රයක් තිබුණේ සෝඩියම් වැල්ප්‍රොයිට් 200mg පෙති සඳහා පමණක් බවයි.

ඔවුන්ට සෝඩියම් වැල්ප්‍රොයිට් 100mg පෙති සඳහා වලංගු බලපත්‍රයක් නැත.

එහෙත් ඔවුන් නමින් නිකුත් කර ති 100mg සහ 200mg පත්‍රිකා දෙකෙහිම ලියාපදිංචි අංකය එකක් බව පෙනීගොස් ඇත.

වෛද්‍ය සැපයුම් අංශය විසින් පිළිගෙන ඇති බවට වාර්තා වූ ව්‍යාජ සහතිකය “සත්‍ය පිටපතක්” බවට නීතිඥයකු විසින් සහතික කිරීමක් ද කර නොමැත.

එහි “තාවකාලික” ලියාපදිංචිය ලෙස වර්ගීකරණය කර (වසරක් සඳහා වලංගු වේ, 2023 ජූලි 31 දක්වා) සෝඩියම් වැල්ප්‍රෝට් මිලිග්‍රෑම් 100 පෙත්තක මිල රු. 15.20ක් ලෙසත් දක්වා තිබේ.

අදාළ ඖෂධය සඳහා ජාතික ඖෂධ නියාමන අධිකාරියේ ව්‍යාජ ලියාපදිංචියක් උත්පාදනය කිරීම හෝ ඉදිරිපත් කිරීම නිව්ජෙන් ලංකා සමාගම ද තරයේ ප්‍රතික්ෂේප කර ඇත.

සමාගමේ ප්‍රධාන මෙහෙයුම් නිලධාරී ජයසංඛ අලහේන්ද්‍ර The Morning වෙත පවසා ඇත්තේ, තම සමාගම සෝඩියම් වැල්ප්‍රොයිට් මිලිග්‍රෑම් 100 සඳහා බලපත්‍රයක් ඉල්ලා සිටියද එය මෙතෙක් ලැබී නොමැති බවයි.

“මෙවැනි ඕනෑම දෙයකට සම්බන්ධ වීම අපි තරයේ ප්‍රතික්ෂේප කරනවා, එවැනි ප්‍රශ්නයක් ගැන අපි දන්නෙත් නැහැ ” යනුවෙන් ඔහු අවධාරණය කර ඇත.

නිව්ජෙන් ලංකා සමාගම කිසිවිටෙක වෛද්‍ය සැපයුම් අංශය සඳහා සෝඩියම් වැල්ප්‍රොයිට් 100mg නිපදවා හෝ සපයා නැති බව ද ඔහු පවසයි.

ඒ අනුව, ජාතික ඖෂධ නියාමන අධිකාරිය විසින් සමාගමේ සෝඩියම් වැල්ප්‍රොයිට්හි සියලුම නිෂ්පාදනය කිරීම් විමර්ශනය පැවැත්වෙන තෙක් අත්හිටුවා ඇත.

ජාතික ඖෂධ නියාමන අධිකාරියේ ව්‍යාජ ලියාපදිංචි සහතිකයක් යන්නෙන් අදහස් වන්නේ අදාළ ඖෂධය පරීක්ෂාවෙන් ගැලවී යෑමයි.

සෞඛ්‍ය ප්‍රසම්පාදන කටයුතු පිළිබඳ අපකීර්තියෙන් පසු පිරිසිදු කිරීමේ කොටසක් ලෙස වෛද්‍ය සැපයුම් අංශය එහි ලිපිගොනුවල විවිධ ලේඛන නැවත පරීක්ෂා කිරීමට පියවර ගෙන තිබේ.

ලියාපදිංචිය අත්හැරීම් සහ විවිධ වෛද්‍ය ඖෂධ සහ උපාංග සඳහා ජාතික ඖෂධ නියාමන අධිකාරිය විසින් නිකුත් කරන ලද ලියාපදිංචි කිරීම් ද ඊට ඇතුළත් වේ.