මේ දිනවල පැවැත්වෙන පළාත් පාලන ඡන්ද විමසීමේ ප්‍රචාරක කටයුතුවලදී මැතිවරණ නීති උල්ලංඝණය කළ බවට චෝදනා කරමින් ජනාධිපති අනුර කුමාර දිසානායකට එරෙහිව මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය විසින් මැතිවරණ කොමිෂන් සභාවට දෙවන වරටත් පැමිණිල්ලක් ඉදිරිපත් කර තිබේ.

මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය විසින් අප්‍රේල් 02 වනදා ඉදිරිපත් කළ සිය පළමු පැමිණිල්ලෙන් පසුව ඉකුත් සිකුරාදා මෙම පැමිණිල්ල ඉදිරිපත් කර ඇතැයි වාර්තා වේ.

එම දෙවන පැමිණිල්ල මගින් ජනාධිපතිවරයාට එරෙහිව නව චෝදනා හයක් දක්වා ඇත.

මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථානය සිය පළමු පැමිණිල්ලේදී ජනාධිපති අනුර කුමාර දිසානායක විසින් මාර්තු 29 දින තිස්සමහාරාමයේදී සහ මාර්තු 31 බුත්තලදී පැවැති ජනහමුවලදී සිදු කළ ප්‍රකාශයන් උපුටා දක්වා තිබිණි.

දෙවන වර ඉදිරිපත් කර ඇති චෝදනා හයෙන් අප්‍රේල් 10 වැනිදා මහනුවරදීත්, අප්‍රේල් 11 වැනිදා අක්කරපත්තුවේදී සහ සම්මන්තුරේදීත්, අප්‍රේල් 12 වැනිදා කන්තලේ සහ මඩකලපුවේදීත්, අප්‍රේල් 17 වැනිදා මන්නාරමේදීත් පැවැති ජනහමුවලදී සිදු කළ ප්‍රකාශයන් සම්බන්ධයෙන් දක්වා තිබේ.

ඒ අනුව මැතිවරණ ප්‍රචණ්ඩ ක්‍රියා නිරීක්ෂණ මධ්‍යස්ථාන පවසන්නේ මෙම සියලුම ජාතික ජනබලවේගයේ මැතිවරණ රැස්වීම්වලදී, එම පක්ෂයේ නියෝජිතයින් ප්‍රාදේශීය සභා පාලනය නොකරන්නේ නම්, එම සභාවල මූල්‍ය අවශ්‍යතා ප්‍රමාද වන බව හෝ කිසිසේත්ම ඉටු නොවන බව ජනාධිපතිවරයා ප්‍රකාශ කර ඇති බවයි.

මෙම සියලු ප්‍රකාශවලදී ජනාධිපතිවරයා කියා සිටියේ රජයට අරමුදල් සැපයීම සහතික කළ නොහැකි වූයේ වෙනත් පක්ෂවල නියෝජිතයන් විශ්වාස නොකරන බැවින් මෙන්ම ජාතික ජනබලවේගයේ නොවන යෝජනා දස වතාවක් පරීක්ෂා කිරීමට සිදුවන බවත් එම පක්ෂයෙන් ගෙන එන යෝජනා ප්‍රශ්නයකින් තොරව පිළිගෙන අරමුදල් සපයන බව යැයි එම මධ්‍යස්ථානය පවසයි.