අග්‍රාමාත්‍ය ආචාර්ය හරිනි අමරසූරිය ජර්මනියේ හැම්බර්ග් හි සිදුකළ සංචාරයේ දී දෙරට අතර වෘත්තීය අධ්‍යාපනය සහ ආර්ථික සබඳතා ශක්තිමත් කිරීම කෙරෙහි අවධානය යොමු කළ බව බර්ලිනයේ ශ්‍රී ලංකා තානාපති කාර්යාලය නිවේදනයක් නිකුත් කරමින් පවසයි.

ඇය එම සංචාරයේ නිරත වී තිබුණේ 2025 මාර්තු 27 සිට 30 දක්වායි.

හැම්බර්ග් යනු ජර්මනියේ දෙවැනි විශාලතම නගරය වන අතර ආසියාව සමඟ වෙළඳ සබඳතා පිළිබඳ දිගු ඉතිහාසයක් ඇති ප්‍රධාන යුරෝපීය වරාය නගරයකි.

ශ්‍රී ලංකා තානාපති කාර්යාලය නිකුත් කළ නිවේදනයේ දැක්වෙන්නේ ජර්මනියේ ජනාධිපති ෆ්‍රෑන්ක්-වෝල්ටර් ස්ටයින්මියර් සහ අගමැති අමරසූරිය 102 වැනි නැගෙනහිර ආසියානු මිත්‍රත්ව රාත්‍රී භෝජන සංග්‍රහයේ ගෞරවනීය ආරාධිතයන් ලෙස සහභාගී වූ බවයි.

ජර්මානු ආසියා-පැසිෆික් ව්‍යාපාරික සංගමයේ වාර්ෂික රැස්වීම ජර්මානු-ආසියානු ව්‍යාපාරික සබඳතා ප්‍රවර්ධනය කිරීම සඳහා වන විශාලතම ජර්මානු සංගමය ද වේ.

ඉහළ පෙළේ නියෝජිතයන් ඇතුළු සම්භාවනීය අමුත්තන් 300 දෙනෙකු ඉදිරියේ ගෞරවනීය ආරාධිත අමුත්තා ලෙස සහභාගී වූ අගමැති අමරසූරිය, ශ්‍රී ලංකාව සහ ජර්මනිය අතර ආර්ථික සබඳතා ශක්තිමත් කිරීමේ හැකියාවන් ඉස්මතු කළාය.

2022 දී අභියෝගාත්මක ආර්ථික අර්බුදයකට මුහුණ දුන්නද, ශ්‍රී ලංකාවේ ආර්ථිකය සාපේක්ෂව කෙටි කාලයක් තුළ බොහෝ දුරට යථා තත්ත්වයට පත්ව ඇති බව ඇය නැවත අවධාරණය කළාය.

දියුණු වන ආර්ථිකය, නැවත නැගී එන සංචාරක ව්‍යාපාරය සහ නව රජයේ ප්‍රතිපත්ති ප්‍රතිසංස්කරණ මඟින් ආයෝජන සහ ව්‍යාපාර සඳහා පහසුකම් සපයන පරිසරයක් නිර්මාණය වී ඇති බැවින්, ශ්‍රී ලංකාවේ ඇති අවස්ථා ගවේෂණය කරන ලෙස අගමැති අමරසූරිය ජර්මානු සමාගම්වලට ආරාධනා කර තිබේ.

ජර්මානු සමාගම් 160කට අධික සංඛ්‍යාවක් ශ්‍රී ලංකාවේ ආයෝජනය කර ක්‍රියාත්මක වන බව ද අගමැතිනිය මෙහිදී ප්‍රකාශ කළාය.

ශ්‍රී ලංකාවේ ජර්මානු කර්මාන්ත හා වාණිජ නියෝජිත කණ්ඩායම (AHK Sri Lanka) රට තුළ ශක්තිමත් පැවැත්මක් පවත්වා ගෙන යන අතර, බොහෝ ව්‍යාපෘති සහ සංචාර සංවිධානය කරයි.

102 වැනි නැගෙනහිර ආසියානු මිත්‍රත්ව රාත්‍රී භෝජන සංග්‍රහයට සමගාමීව ජනාධිපති ස්ටයින්මියර් සහ අගමැති අමරසූරිය රැස්වීමක් පැවැත්වූහ.

මෙම හමුව අතරතුර, අවදානමට ලක්විය හැකි කණ්ඩායම්වල සමාජ ආරක්ෂාව සහතික කරමින් ආර්ථිකය ස්ථාවර කිරීම සඳහා රජය දරන උත්සාහයන් අග්‍රාමාත්‍යවරිය විස්තර කර තිබේ.

ජර්මානු ජනාධිපති ස්ටයින්මියර් සහ අගමැති අමරසූරිය වෘත්තීය අධ්‍යාපන ක්ෂේත්‍රයේ දෙරට අතර සහයෝගීතාව පිළිබඳව ද සාකච්ඡා කළහ.

1959 දී මොරටුවේ ශ්‍රී ලංකා-ජර්මානු තාක්ෂණික පුහුණු ආයතනය පිහිටුවීමත් සමඟ ආරම්භ වූ ශ්‍රී ලංකාවේ වෘත්තීය අධ්‍යාපන අංශයේ සංවර්ධනය සඳහා වසර 65කට වැඩි කාලයක් පුරා ජර්මානු රජය විසින් ලබා දෙන ලද ත්‍යාගශීලී දායකත්වයට ශ්‍රී ලංකාවේ කෘතඥතාව ද අගමැතිවරිය පළ කළාය.

සංචාරය අතරතුර හැම්බර්ග්හි පැවති ව්‍යාපාරික වටමේස සාකච්ඡාවකට සහභාගී වෙමින් අගමැතිනිය ජර්මානු සමාගම් සහ රජයේ ආයතනවල නියෝජිතයන් සමඟ රජයේ ආර්ථික දැක්ම පිළිබඳ අදහස් හුවමාරු කරගෙන තිබේ.