වැලිගම හෝටලයකට වෙඩි තැබීමේ සිද්ධිය සම්බන්ධයෙන් කොළඹ අපරාධ කොට්ඨාසයේ (CCD) හිටපු අධ්‍යක්ෂ නෙවිල් ද සිල්වාට ලබා දී තිබූ නියෝගයක් තවදුරටත් පවත්වාගෙන යෑම සඳහා අභියාචනාධිකරණය විසින් පෙර නියෝගය දීර්ඝ කිරීමට කටයුතු කර තිබේ.

කෙසේවෙතත්, නඩුවට සම්බන්ධ අනෙකුත් පෙත්සම්කරුවන්ට මෙම දීර්ඝ කිරීම අදාළ වූයේ නැත.

ඔහු අත්අඩංගුවට ගැනීම වැළැක්වීම සඳහා මෙම රිට් අයදුම්පත මෑතකදී ගොනු කරන ලද අතර, නෙවිල් ද සිල්වා වෙනුවෙන් පෙනී සිටි ජනාධිපති නීතිඥ එරාජ් ද සිල්වාගේ කරුණු විමසීමෙන් පසුව, අභියාචනාධිකරණය මීට පෙර ඔහු පමණක් අත්අඩංගුවට ගැනීමෙන් වැළකී සිටීමට අවසර දෙන නියෝගයක් නිකුත් කර තිබිණි.

මෙම නඩුව විභාගයට ගත් විට, නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජෙනරාල් මහේෂිකා සිල්වා එම නියෝගය දීර්ඝ කිරීමට විරුද්ධ වූවාය.

කෙසේවෙතත්, සියලු පාර්ශවයන් විසින් කරන ලද කරුණු සළකා බැලීමෙන් පසු, අභියාචනාධිකරණ විනිසුරු ගිහාන් කුලතුංග නියෝග කළේ නෙවිල් ද සිල්වාට ලබා දී තිබූ අත්අඩංගුවට ගැනීමෙන් වැළකී සිටීමේ තත්ත්වය ඊළඟ නඩු දිනය දක්වා දීර්ඝ කිරීමටයි.

කෙසේවෙතත්, මාතර මහේස්ත්‍රාත් අධිකරණය ඔවුන් අත්අඩංගුවට ගැනීම සඳහා දැනටමත් නියෝගයක් නිකුත් කර ඇති බැවින්, අනෙකුත් පෙත්සම්කරුවන් සම්බන්ධයෙන් නියෝගය දීර්ඝ කිරීමක් ලබා දී නොමැත.

මෙම නඩුව මාර්තු 26 වැනි දින යළි කැඳවීමට නියම කරන ලදී.

දිමුතු කුරුප්පුආරච්චිගේ උපදෙස් මත ජනාධිපති නීතීඥ එරාජ් ද සිල්වා, දමින්ද විජයරත්න, හරිත් හෙට්ටිආරච්චි, එන්.කේ.අශෝක්භාරන්, සංජන මාපටුන සහ පාරමී ගුණවර්ධන පෙත්සම්කරු වෙනුවෙන් පෙනී සිටියහ.