ඉන්දියාවේ ඉහළම ශ්‍රේණිගත ඉංජිනේරු ආයතනයක් වන Indian Institute of Technology Madras (IIT Madras) හි ශාඛාවක් මේ වසරේ මහනුවරදී විවෘත කිරීමට සැලසුම් කරමින් පවතින බව වාර්තා වේ.

Daily News වාර්තා කර ඇති ආකාරයට, මෙම පියවර IIT විදේශයන්හි සිදුකරන සිය ආයතනයේ ව්‍යාප්තියේ කොටසක් වන අතර, නව විශ්වවිද්‍යාලය සඳහා වන යෝජනාව පසුගිය නොවැම්බර් මාසයේදී 2024 අයවැයෙන් ප්‍රකාශයට පත්කර ඇත.

මෙම ව්‍යාපෘතිය වෙනුවෙන් අධ්‍යාපන ඇමැති සුසිල් ප්‍රේමජයන්ත සිය අමාත්‍යාංශයේ විද්වතුන් කණ්ඩායමක් මදුරාසියේ IIT වෙත යැවීමට සැලසුම් කර තිබේ.

විශ්වවිද්‍යාලය පිහිටුවීම පිළිබඳ සාකච්ඡා සඳහා IIT දූත පිරිසක් ලබන මාසයේ ශ්‍රී ලංකාවට පැමිණීමට පෙර, ශ්‍රී ලංකා නියෝජිත පිරිස ඉන්දියාවට යැවෙනු ඇත.

අධ්‍යාපන ඇමතිවරයා වැඩිදුරටත් පවසන්නේ, IIT මදුරාසි කණ්ඩායම සිය පාඨමාලා විස්තර කරමින් මහනුවර ශාඛා මණ්ඩපය පිහිටුවීමේ ක්‍රියාවලිය ආරම්භ කරමින් ශ්‍රී ලංකා විශ්වවිද්‍යාල ප්‍රතිපාදන කොමිෂන් සභාවට (UGC) වාර්තාවක් ඉදිරිපත් කිරීමට ද අපේක්ෂා කරන බවයි.

ඇමැති සුසිල් ප්‍රේමජයන්ත ශ්‍රී ලංකාවේ මණ්ඩපයක් පිහිටුවීම සම්බන්ධයෙන් IIT-Madras සමඟ සාකච්ඡා කිරීම සඳහා පසුගිය වසරේ දෙසැම්බර් මාසයේදී ඉන්දියාවේ සංචාරයක නිරත වීමෙන් පසුව මෙම වර්ධනය සිදුව ඇත.