ට්‍රම්ප් පරිපාලනය විසින් එක්සත් ජනපද කොංග්‍රසයට නිකුත් කරන ලද ලේඛනවලට අනුව, USAID හරහා ශ්‍රී ලංකාවට ලැබුණු එක්සත් ජනපද ආධාර ප්‍රවාහය සම්පූර්ණයෙන්ම නතර වී තිබේ.

2024-2025 මූල්‍ය වර්ෂය තුළ ශ්‍රී ලංකාවට අමෙරිකානු ඩොලර් මිලියන 53ක් ලැබෙමින් තිබූ අතර, ඒ සියල්ල කපා හැර ඇති බව ලේඛන විශ්ලේෂණය කළ ගෝලීය සංවර්ධන මධ්‍යස්ථානය පවසයි.

මෙය ශ්‍රී ලංකාවේ දළ ජාතික ආදායමෙන් 0.07%ක් පමණ විය.

ගෝලීය පරිමාණයෙන්, සිවිල් සමාජය හෝ පෞද්ගලික අංශයේ තරඟකාරිත්වය වැනි සමහර අරමුදල් ක්ෂේත්‍ර ට්‍රම්ප් පරිපාලනය විසින් සම්පූර්ණයෙන්ම ඉවත් කර ඇත.

‘වර්ධනය සඳහා සාර්ව ආර්ථික පදනම’, ‘ආරක්ෂාව, ආධාර සහ විසඳුම්’ සහ HIV/AIDS ඇතුළු අනෙකුත් ඒවා සාපේක්ෂව ඉතිරි කර ඇති බව ගෝලීය සංවර්ධන මධ්‍යස්ථානය අනාවරණ කළේය.

සම්පූර්ණයෙන්ම නතර වූ ව්‍යාපෘති සඳහා ශ්‍රී ලංකාවට බොහෝ දුරට අරමුදල් ලැබෙමින් තිබිණි.

සිවිල් සමාජ සංවිධාන සාමූහිකය විසින් පවත්වන ලද සංවිධාන 53ක සමීක්ෂණයකට අනුව, සෘජු ප්‍රතිලාභීන් 565,000කට වැඩි පිරිසක් සහ කාර්ය මණ්ඩලය 400කට වැඩි පිරිසක් සඳහා USAID විසින් අරමුදල් සපයන ලදී.

සංවිධාන 53ක් පමණක් ප්‍රතිචාර දැක්වූ බැවින්, මෙම සංඛ්‍යා සම්පූර්ණ චිත්‍රය ලබා නොදෙන බව සාමූහිකයේ සාමාජික රෝහණ හෙට්ටිආරච්චි අනතුරු ඇඟවීය.

ට්‍රම්ප් පරිපාලනය විසින් ආරම්භ කරන ලද අරමුදල් අත්හිටුවීමෙන් ලෝකයම කම්පනයට පත්ව සිටී.

යුක්රේනයට අමෙරිකානු ඩොලර් බිලියන 1.4ක විශාලතම කප්පාදුවක් සිදු කළ අතර එය එරට් මුළු USAID වැඩසටහනෙන් 15%ක් පමණි.

ලයිබීරියාව, පලස්තීනය, සෝමාලියාව සහ ඇෆ්ගනිස්ථානය යන රටවල, USAID කප්පාදුව ඔවුන්ගේ රටවල දළ ජාතික ආදායමෙන් 1%කට වඩා වැඩි ප්‍රමාණයක් වන අතර එය ඔවුන්ගේ ආර්ථිකයට සහ සංවර්ධනයට දැඩි බලපෑමක් පෙන්නුම් කරයි.

රටක් සඳහා වන නිශ්චිත අරමුදල්වලට අමතරව, සියලුම USAID අරමුදල්වලින් 20%ක් පමණ ගෝලීය හෝ කලාපීය වැඩසටහන් සඳහා විය.

ව්‍යාපෘති අවසන් කිරීමට නියමිත අන්තර්ජාතික සංවිධාන අතර UNDP, IOM, FAO සහ UNAIDS යන ආයතන ඇතුළත් වේ.