ශ්‍රී ලංකාවේ පැවැති ලෙජන්ඩ්ස් කුසලාන 2024 ක්‍රිකට් තරගාවලියේදී තරග පාවාදීමේ චෝදනා මත ඉන්දීය ජාතික ආකාෂ් පච්ලෝඩියාට වසර 02ක බරපතළ වැඩ සහිත සිරදඬුවම් දෙකක් වසර 10කට අත්හිටුවා තිබේ.

තරගාවලියේදී තරග පාවාදීමට තැත් කළ බවට ආකාෂ් පච්ලෝඩියා වරද පිළිගැනීමෙන් පසු මහනුවර මහාධිකරණය අද දඬුවම් නියම කරමින් රුපියල් මිලියන 11ක දඩයක් ද නියම කළේය.

ආකාෂ් පච්ලෝඩියා 2024 මාර්තු මාසයේදී පල්ලෙකැලේ හිදී පැවති 2024 ලෙජන්ඩ්ස් ක්‍රිකට් කුසලානයේ පන්ජාබ් රෝයල් කණ්ඩායමේ කළමනාකරු විය.

ලෙජන්ඩ්ස් ක්‍රිකට් තරගාවලියේදී ඉන්දීය ක්‍රිකට් කළමනාකරු යෝනි පටෙල් සහ ඔහුගේ සහායක ආකාෂ් පච්ලෝඩියා තරග පාවාදීම සඳහා තමන් වෙත පැමිණි බවට විශ්‍රාමික ශ්‍රී ලංකා ක්‍රිකට් ක්‍රීඩකයකු සහ නවසීලන්ත ක්‍රිකට් ක්‍රීඩකයකු චෝදනා කිරීමත් සමඟ පරීක්ෂණයක් ආරම්භ කෙරිණි.

මහනුවරදී පැවැති ක්‍රිකට් තරගාවලියේදී තරග පාවාදීමේ චෝදනාව මත මහනුවර සෑම්ප් යුද හමුදා කණ්ඩායමේ හිමිකරු යෝනි පටෙල්ට මුලින් චෝදනා එල්ල විය.

තරග පාවාදීම් සම්බන්ධ වැරදි කිහිපයක් අපරාධයක් බවට පත් කළ පළමු දකුණු ආසියානු රට ශ්‍රී ලංකාව වන අතර නව රෙගුලාසි යටතේ විභාග කෙරෙන පළමු නඩුව මෙය විය.

2019 වසරේ එවක ක්‍රීඩා ඇමැති හරීන් ප්‍රනාන්දු විසින් හඳුන්වා දුන් නීති අනුව තරග පාවාදීම් සම්බන්ධයෙන් වරදකරුවන්ට වසර 10ක සිර දඬුවමක් සහ ඩොලර් 555,000ක දඩ මුදලක් ගෙවීමට සිදුවේ.