මෙරට වෛද්‍යවරයකු ලෙස ලියාපදිංචි වීම සඳහා නැගෙනහිර විශ්ව විද්‍යාලයේ විභාග මධ්‍යස්ථානයේ පවත්වන විභාගයේ එක් කොටසක් අවලංගු කිරීමට හේතුව ඥාති සංග්‍රහයක් බවට චෝදනා එල්ල වෙමින් තිබේ.

2024 අප්‍රේල් මස විභාගයට මුහුණ දුන් අපේක්ෂකයන්, තීරණ ගැනීමේ ක්‍රියාවලියේදී ශ්‍රී ලංකා වෛද්‍ය සභාවේ සභාපතිවරයාගේ භූමිකාව සම්බන්ධයෙන් ඔහුට එරෙහිව චෝදනා ඉදිරිපත් කර ඇත.

2024 මැයි 1 දිනැතිව ශ්‍රී ලංකා වෛද්‍ය සභාවේ රෙජිස්ට්‍රාර් වෙත යවන ලද ලිපියකට අනුව, විභාගය හදිසියේ අවලංගු කිරීම සහ පසුව මැයි මාසයේදී නව විභාගයක් ප්‍රකාශයට පත් කිරීම සම්බන්ධයෙන් අපේක්ෂකයන් සිය අප්‍රසාදය පළකර ඇත.

ආසන්න වශයෙන් 40ක් පමණ වන අපේක්ෂකයන් තර්ක කරන්නේ මෙම තීරණය අත්තනෝමතික සහ වෙනස් කොට සැළකීමක් වන අතර, එය ඔවුන් වෙහෙස මහන්සි වී උපයාගත් ලකුණු අහිමි කර ඔවුන්ගේ අනාගත වෘත්තීය අපේක්ෂාවන්ට බලපෑමක් ඇතිකර ඇති බවයි.

විභාගය අතරතුර භාෂා පරිවර්තකයකු නොමැතිවීම සම්බන්ධයෙන් අපේක්ෂකයකු කළ පැමිණිල්ලකට ප්‍රතිචාර දක්වමින් සභාපතිවරයා නිසි ක්‍රමවේදයක් අනුගමනය නොකර මැදිහත් වූ බවට එම ලිපියෙන් චෝදනා කර තිබේ.

අදාළ අපේක්ෂකයා සභාපතිවරයා සමඟ සමීප සබඳතා පැවැත්වූ විශේෂඥයකුගේ දියණියක බව පැවසේ.

ප්‍රශ්නය සාධාරණ ලෙස විසඳනවා වෙනුවට එම දියණිය ඇතුළු සියලුම අයදුම්කරුවන්ට ලකුණු එකතු කර ඇයගේ සමත්වීම සහතික කරන ලෙස සභාපතිවරයා උපදෙස් දුන් බවට ලිපියෙන් චෝදනා කරයි.

විභාග සම්බන්ධීකාරකවරයා සහ සභාව සභාපතිවරයාගේ නියෝගය පිළිපැදීම ප්‍රතික්ෂේප කළ විට ඔහු සිය තනතුර යොදා ගනිමින් සියලු අයදුම්කරුවන්ගේ විභාගය අවලංගු කර සියලු දෙනාටම නැවත විභාගයක් පවත්වන ලෙස නියෝග කළ බව කියනු ලැබේ.

එපමණක් නොව, මේ සම්බන්ධයෙන් විමර්ශනය කිරීමට පත්කළ කමිටුවට සභාපතිවරයාගේ හිතවතුන් පත්කිරීමත්, එමගින් පරීක්ෂණයේ ප්‍රතිඵලයට බලපෑම් එල්ල කරන බවටත් එම ලිපියෙන් චෝදනා කරයි.

එම තීරණය හේතුවෙන් තමන්ට අත්වන බරපතළ සහ ආපසු හැරවිය නොහැකි පාඩුව අවධාරණය කරමින්, විභාගය අවලංගු කිරීම නැවත සළකා බලා ප්‍රතිඵල නිකුත් කරන ලෙස අපේක්ෂකයෝ ශ්‍රී ලංකා වෛද්‍ය සභාවෙන් ඉල්ලා සිටිති.