July 1, 2024
වැලිමඩ ප්‍රදේශයේ නිෂ්පාදකයෙක් මිරිස් රසැති අයිස්ක්‍රීම් වර්ගයක් සකස් කරමින් නව්‍ය නිර්මාණයක් සිදුකර ඇත.
කෘෂිකර්ම හා වැවිලි කර්මාන්ත අමාත්‍යාංශය විසින් සපයනු ලබන කෘෂිකාර්මික අංශය නවීකරණය කිරීමේ වැඩසටහනේ තාක්ෂණික හා මුල්‍ය දායකත්වය යටතේ ලසන්ත රුවන් ලංකාතිලක විසින් මෙම අයිස්ක්‍රීම් වර්ගය නිෂ්පාදනය කර ඇත.
අලුතින් නිෂ්පාදනය කරන ලද අයිස්ක්‍රීම් කෘෂිකර්ම ඇමැති මහින්ද අමරවීර සහ කෘෂිකර්ම රාජ්‍ය ඇමැති මොහාන් ප්‍රියදර්ශන ද සිල්වා වෙත පිරිනමා තිබේ.
අගය එකතු කළ නිෂ්පාදනයක් ලෙස වෙළෙඳපොළට හඳුන්වා දෙන මෙම මිරිස් රසැති අයිස්ක්‍රීම්, නව රසයක් හඳුන්වාදෙමින් පැණි රස හා මිරිස් සැර මිශ්‍රණයකින් සමන්විත වේ.
ඌව විශ්වවිද්‍යාලයේ ආහාර විද්‍යා හා තාක්ෂණ පීඨයේ මගපෙන්වීම යටතේ වට්ටෝරුව පර්යේෂණය කිරීමෙන් එය නිෂ්පාදනය කර ඇත.
ළමුන් සහ වැඩිහිටියන් සඳහා නිෂ්පාදන වර්ග දෙකක් ලෙස හඳුන්වා දී ඇති මෙම අයිස්ක්‍රීම් ළඟදීම වෙළඳපොළට නිකුත් කිරීමට නියමිතය.
