තම පරිපාලනය තුළ අනුමත කරන ලද සියලුම පුනර්ජනනීය බලශක්ති යෝජනා සම්පූර්ණ ඇගයීම් ක්‍රියාවලියකට භාජනය වූ බවත් ඒවා මූල්‍ය හෝ දේශපාලනමය වශයෙන් බලපෑමට ලක් නොවූ බවත් හිටපු ජනාධිපති රනිල් වික්‍රමසිංහ පවසයි.

2023-2024 කාලයේ පුනර්ජනනීය බලශක්ති ව්‍යාපෘති අනුමත කිරීම් පිළිබඳ අදහස් දක්වමින් වික්‍රමසිංහ සඳහන් කළේ ශ්‍රී ලංකාවේ බලශක්ති අංශයට බෙහෙවින් අවශ්‍ය විදේශ ආයෝජන ආකර්ෂණය කර ගැනීම සඳහා යෝජනා කිහිපයකට එම කාලය තුළ අඩිතාලම දැමු බවයි.

“ව්‍යාපෘති නිශ්චිත කමිටු විසින් නිසි ඇගයීම් සහ මිල නියම කිරීමෙන් පසුව, අපි අමෙරිකානු ඩොලර් බිලියන 2 සිට 2.5 දක්වා වටිනා ව්‍යාපෘති අනුමත කළා,” යනුවෙන් ඔහු පැවසීය.

අදානි සමූහය සහ හේලීස් යන දෙඅංශය සම්බන්ධයෙන් අනුගමනය කරන ලද ක්‍රියාවලීන් ද ඔහු පැහැදිලි කළේය.

අනුමැතියට පෙර සෑම යෝජනාවක්ම සමාලෝචනය කිරීම සඳහා මුදල් අමාත්‍යාංශය සහ කැබිනට් මණ්ඩලය විසින් කමිටු පත් කරන ලද බව ඔහු පෙන්වා දුන්නේය.

“මෙම කමිටු වාර්තා මත පදනම්ව අවසාන මිල ගණන් තීරණය කෙරුණා. සියලුම තීරණ නිල මාර්ග හරහා ගන්නා බවට අපි සහතික වුණා,” යනුවෙන් ඔහු තවදුරටත් පැවසීය.

පාරිසරික සහ යටිතල පහසුකම් සාධක පිළිබඳවඅදහස් දක්වමින් වික්‍රමසිංහ පෙන්වා දුන්නේ මන්නාරමේ සංක්‍රමණික පක්ෂීන් පිළිබඳ රජය විසින් මෙහෙයවන ලද අධ්‍යයනයක් හේලීස් ව්‍යාපෘතිය සඳහා සිදු කළ බවයි.

හේලීස් ව්‍යාපෘතිය සඳහා ඉඩම් ලබා දුන්නේ විදුලිබල මණ්ඩලය හරහා වන අතර, අදානි සමාගමට ඉඩම මිලදී ගැනීමට සිදු විය.

“සියලුම මූලික අධ්‍යයන, ශක්‍යතා තක්සේරු කිරීම් සහ බලපත්‍ර පිරිවැය එක් එක් ව්‍යාපෘතිය සඳහා ඒවායේ නිශ්චිත තත්ත්වයන් අනුව වෙනස් ලෙස හසුරුවා තිබුණා,” යනුවෙන් ඔහු පැවසුවේ, අදානි මෙම ක්‍රියාවලීන් කිහිපයකට ස්වාධීනව අරමුදල් සැපයිය යුතුව තිබු බව සඳහන් කරමිනි.

මුදල් බලපෑම් මත මෙම ව්‍යාපෘති මෙහෙයවූ බවට එල්ල වන චෝදනා ප්‍රතික්ෂේප කරමින් වික්‍රමසිංහ ප්‍රකාශ කළේ, යමෙකු මුදල් ලබා ගත් බව කියා සිටින්නේ නම්, ඔවුන් මුදල් ලබා දුන්නේ කවුරුන්ද යන්න ද සඳහන් කළ යුතු බවයි.

“අදානි අල්ලස් දුන් බවට යෝජනා කරනවාද? අදානි ශ්‍රී ලංකාවේ හෝ ඉන්දියාවේ නීති උල්ලංඝනය කළ බව අපි කියනවාද?” යනුවෙන් ඔහු ප්‍රශ්න කරයි.

ඉන්දීය අග්‍රාමාත්‍ය නරේන්ද්‍ර මෝදිගේ ශ්‍රී ලංකා සංචාරයේදී එවැනි කරුණු දේශපාලනීකරණය නොකළ යුතු බවත්, පදනම් විරහිත චෝදනා රාජ්‍ය තාන්ත්‍රික සබඳතාවලට හානි කළ හැකි බවටත් ඔහු අනතුරු ඇඟවීය.

“2023 සහ 2024 දී නිකුත් කරන ලද ඒකාබද්ධ ප්‍රකාශයන්ට අනුකූලව මෙම ව්‍යාපෘති සම්පූර්ණ කිරීම සහ ශ්‍රී ලංකා-ඉන්දියානු සබඳතා ශක්තිමත් කිරීම කෙරෙහි අපි අවධානය යොමු කළ යුතුයි,” යැයි ඔහු පැවසීය.

රජය ඉන්දියාව සමඟ බලශක්ති සහයෝගීතාව සම්බන්ධයෙන් අඛණ්ඩව කටයුතු කරන බව වික්‍රමසිංහ නැවත තහවුරු කළ අතර, ව්‍යාපෘති නැවැත්වීමට ගන්නා ඕනෑම තීරණයකට වලංගු හේතු තිබිය යුතු බව අවධාරණය කළේය.

වික්‍රමසිංහ මේ බව සඳහන් කළේ, රජයේ යෝජිත මිලට සමාගම එකඟ වන තුරු තම රජය මන්නාරම සුළං බලාගාරය සඳහා විදුලි මිලදී ගැනීමේ ගිවිසුම ඉදිරියට ගෙන නොයන බවට ජනාධිපති අනුර කුමාර දිසානායක සිටින ස්ථාවරය සම්බන්ධයෙනි.

පෙර රජය ඒකකයකට අමෙරිකානු ඩොලර් ශත 8.26ක අනුපාතයකට එකඟ වූ බවත්, වෙනත් සමාගමක් සමඟ වත්මන් ගිවිසුම මඟින් ඒකකයකට අමෙරිකානු ඩොලර් ශත 4.57ක ගනුදෙනුවක් ලබා ගත් බවත් දිසානායක පැවසීය.

එම වෙනස රු. 13 වෙනුවට රු. 25කි.

“කොයි ගිවිසුමක් අත්සන් කළත්, ඔවුන් අපගේ මිලට එකඟ වන තුරු අපි කිසි විටෙකත් ඉදිරියට යන්නේ නැහැ,” යනුවෙන් ජනාධිපති දිසානායක ප්‍රකාශ කළේය.