ඖෂධීය මත්ද්‍රව්‍ය සම්බන්ධ අපයෝජන උවදුර අවම කිරීම සඳහා මනෝ ක්‍රියාකාරී ඖෂධ අනිසි ලෙස භාවිත කිරීමේ ප්‍රවණතා හඳුනා ගැනීමට සහ ඒවා මර්දනය කිරීමට පොලිස් සහ සුරාබදු නිලධාරීන්ට සහාය වීමේ වැඩසටහනක් ජාතික ඖෂධ නියාමන අධිකාරිය විසින් ආරම්භ කර තිබේ.

ඒ අනුව එම නිලධාරීන් දැනුවත් කිරීමේ පියවරක් ලෙස, විවිධ රෝග සඳහා ඖෂධ ලෙස නියම කරන මනෝ ක්‍රියාකාරී ද්‍රව්‍ය පිළිබඳ දැනුවත් කිරීමේ විශේෂ වැඩසටහනක් ඖෂධ නියාමන අධිකාරිය විසින් පසුගිය සතියේ සංවිධාන කර තිබිණි.

ඊට පොලිස් මත්ද්‍රව්‍ය නාශක කාර්යාංශයේ නිලධාරීන් 50 දෙනෙකු පමණ සහභාගී වී තිබිණි.

ජාතික අන්තරායකර ඖෂධ පාලන මණ්ඩලය යටතේ 2022 අංක 41 දරන විෂ, අබිං සහ අන්තරායකර ඖෂධ පනත (සංශෝධන) හරහා ඖෂධ හතරක් එහි පනතට ඇතුළත් කර ඇති බව ඖෂධ නියාමන අධිකාරිය පවසයි.

Diazepam, Tramadol, Pregabalin සහ Gabapentin ලෙස හඳුනාගෙන ඇති ඖෂධ, කාංසාව, වලිප්පුව, අපස්මාරය, මත්පැන් අත්හැරීම සහ ස්නායු රෝග වේදනාවන්ට ප්‍රතිකාර කිරීම සඳහා නිතිපතා භාවිත කරනු ලැබේ.

හෙරොයින් සහ අයිස් (මෙතම්ෆෙටමින්) වැනි භයානක මත්ද්‍රව්‍යවලට සමාන සතුටක් සොයා ගැනීම සඳහා තරුණයන් සහ තරුණ වැඩිහිටියන් මෙම ඖෂධ අනිසි ලෙස භාවිත කිරීම නිසා ශ්‍රී ලංකාව අර්බුදයකට මුහුණ දී සිටින බව ඖෂධ නියාමන අධිකාරිය පවසයි.

ඉහත සඳහන් ඖෂධ වර්ග හඳුනාගන්නා ආකාරය, එහි ප්‍රතිඵල සහ අතුරු ආබාධ, ඒවා භාවිත කර අනිසි විපාකවලට ලක් වූවන්ගේ ස්වභාවය මෙන්ම ඒවාට අදාළ නීතිරීති පිළිබඳව ද අදාළ වැඩසටහනේදී පොලිස් නිලධාරීන් පුහුණු කර තිබේ.

බෙහෙත් වට්ටෝරුවකින් තොරව එවැනි මත්ද්‍රව්‍ය ළඟ තබා ගන්නා ඕනෑම අයකු මීට පෙර පොලිසිය විසින් අත්අඩංගුවට ගනු ලැබූ අතර ඒ අනුව එවැනි රෝගයකින් පෙළෙන පවුලේ සාමාජිකයකු වෙනුවෙන් මෙවැනි ඖෂධ මිලදී ගන්නා තරුණයන් ද අත්අඩංගුවට පත්වූ අවස්ථා තිබේ.

මෙම විශේෂ වැඩසටහන ඖෂධ නියාමන අධිකාරියේ ප්‍රධාන විධායක නිලධාරී වෛද්‍ය සවින් සේමගේ, පොලිස් මත්ද්‍රව්‍ය නාශක කාර්යාංශයේ අධ්‍යක්ෂ ජ්‍යෙෂ්ඨ පොලිස් අධිකාරී හේමාල් ප්‍රශාන්ත ද සහභාගී වූ අතර එය මෙහෙයවනු ලැබුවේ ඖෂධ නියාමන අධිකාරියේ ප්‍රධාන ආහාර හා ඖෂධ පරීක්ෂක අමිත් පෙරේරා විසිනි.