ජර්මනියේ සිට පැවත එන්නට ඇතැයි බොහෝ කලක සිට උපකල්පනය කළ කැරපොත්තාගේ සම්භවය පිළිබඳ අනපේක්ෂිත හෙළිදරව්වක් පර්යේෂකයන් විසින් සිදුකර තිබේ.

එම පර්යේෂකයන්ට අනුව කැරපොත්තාගේ මූලාරම්භය දකුණු ආසියාව දක්වා දිව යයි.

ජාතික විද්‍යා ඇකඩමියේ ප්‍රකාශයට පත් කරන ලද අධ්‍යයනයකින් ඇඟවෙන්නේ මෙම සත්වයා දකුණු ආසියාවේ ආරම්භ වී මානව වාසස්ථාන සඳහා ඇති බැඳීම නිසා ගෝලීයව ව්‍යාප්ත වූ බවයි.

එම වාර්තාවේ සඳහන් වූයේ “සර්වසම්පූර්ණ ගෘහස්ථ පළිබෝධකයාට අනපේක්ෂිත සම්භවයක් ඇත. ලොව පුරා මිනිස් වාසස්ථානවල ජීවත් වන කැරපොත්තකු ජර්මානු කැරපොත්තා ලෙස හැඳින්වේ. නමුත් කැරපොත්තා මුලින් ජර්මනියෙන් පැමිණියේ නැත.” යනුවෙනි.

හාවර්ඩ් සරසවියේ පරිණාමීය ජීව විද්‍යාඥ Qian Tang සහ ඔහුගේ සගයන් විසින් ඕස්ට්‍රේලියාව, ඉතියෝපියාව, ඉන්දුනීසියාව, යුක්රේනය සහ එක්සත් ජනපදය ඇතුළු රටවල් 17කින් එකතු කරන ලද ජර්මානු කැරපොත්තන් 281කගේ ප්‍රවේණික ලක්ෂණ විශ්ලේෂණය කර තිබේ.

ඔවුන් කැරපොතු ගහන ස්ථාපිත විය හැක්කේ කවදාද සහ කොතැනද යන්න ගණනය කිරීමට ජාන අතර සමානකම් සහ වෙනස්කම් භාවිත කර ඇත.

ජර්මානු කැරපොත්තාගේ සමීපතම ඥාතියා තවමත් දකුණු ආසියාවේ දක්නට ලැබෙන ආසියානු කැරපොත්තකු වන Blattella asahinai බව ඔවුන් සොයා ගෙන තිබේ.

‘බ්ලැටෙලා ජර්මනිකා’ බොහෝ විට වසර 2,100 කට පමණ පෙර ඉන් වෙන් වී ඇත.

ඉන්පසුව, වසර 1,200කට පමණ පෙර ‘බ්ලැටෙලා ජර්මනිකා’, ඉස්ලාමීය උමය්යාද් සහ අබ්බාසිඩ් කාලිෆේට්වරුන්ගේ වාණිජ හා මිලිටරි ගමනාගමනය සමඟ බටහිර මැද පෙරදිගට ගමන් කර ඇත.

එය වසර 390කට පමණ පෙර දකුණු ආසියාවේ සිට නැඟෙනහිර දෙසට ව්‍යාප්ත වීමට පටන් ගත්තේ යුරෝපීය යටත් විජිතවාදයේ නැගීම සහ ලන්දේසි සහ බ්‍රිතාන්‍ය නැගෙනහිර ඉන්දීය සමාගම් වැනි අන්තර්ජාතික වෙළඳ සමාගම් බිහිවීමත් සමඟය.

ශතවර්ෂයකට පමණ පසු, ජර්මානු කැරපොත්තන් යුරෝපයට ඇතුළු වී ඇති අතර එතැන් සිට ලොව පුරා පැතිර ගොස් ඇත.

ප්‍රධාන පර්යේෂක ආචාර්ය මායා පටෙල් සහ ඇගේ කණ්ඩායම විවිධ ප්‍රදේශවලින් කැරපොත්තන්ගේ ගහනය පිළිබඳ පුළුල් ජාන විශ්ලේෂණයක් සිදු කර තිබේ.

පුදුමයට කරුණක් නම්, ජර්මානු කැරපොත්තන්ගේ ජාන විවිධත්වය දකුණු ආසියාවේ ඉහළම බව ඔවුන් සොයා ගෙන තිබීමයි.

ඒ අනුව මෙම කලාපය කැරපොත්තන්ගේ මුල් නිජබිම විය හැකි බව පෙන්නුම් කර තිබේ.

ජර්මානු කැරපොත්තන් මිනිස් වාසස්ථාන සඳහා දක්වන කැමැත්ත සහ එහි කැපී පෙනෙන අනුවර්තනය වීමේ හැකියාව, එම සතුන් ලොව පුරා ව්‍යාප්ත කිරීමට සමත් වී ඇති බවත් විවිධ පාරිසරික තත්ත්වයන් තුළ වර්ධනය වීමට හැකි වී ඇති බවත් ආචාර්ය පටෙල් පැහැදිලි කර ඇත.

එහි ගෝලීය සංක්‍රමණයේ නිශ්චිත මාර්ගය අවිනිශ්චිතව පවතින අතර, පර්යේෂකයන් විශ්වාස කරන්නේ වෙළඳාම සහ සංචාර වැනි මිනිස් ක්‍රියාකාරකම් සියවස් ගණනාවක් පුරා විවිධ මහාද්වීපවලට කැරපොත්තන් විසුරුවා හැරීමට පහසුකම් සලසා ඇති බවයි.