මෙරට ජ්‍යෙෂ්ඨ පොලිස් නිලධාරීන් 23 දෙනෙකුගෙන් යුත් කණ්ඩායමක් සති දෙකක පුහුණු පාඨමාලාවක් සඳහා නවදිල්ලිය බලා ගොස් තිබේ.

කොළඹ ඉන්දීය මහ කොමසාරිස් කාර්යාලය නිවේදනය කළේ ජූනි 18 වැනිදා ආරම්භ වූ මෙම පුහුණුව අදාළ නිලධාරීන් වෙනුවෙන් විශේෂයෙන් නිර්මාණය කරන ලද පුහුණු පාඨමාලාවක් බවයි.

“ශ්‍රී ලංකා පොලිසියේ ඉල්ලීම පරිදි, ශ්‍රී ලංකා පොලිසියේ නිලධාරීන්ගේ ධාරිතාව ගොඩනැගීමේ පුහුණු පාඨමාලා සඳහා මධ්‍යම රහස් පරීක්ෂක පුහුණු ආයතනය, ජායිපූර් සහ හයිද්‍රාබාද් රහස් පරීක්ෂක පුහුණු ආයතන සහ ජාතික ආරක්ෂක සේවය ප්‍රමුඛ පොලිස් පුහුණු ආයතන සමග ඉන්දීය මහ කොමසාරිස් කාර්යාලය පහසුකම් සපයයි,” යනුවෙන් එම නිවේදනයේ සඳහන් වේ.

“ඉන්දියාව නිලධාරීන්ගේ කුසලතා වැඩි දියුණු කිරීම සඳහා විවිධ පුහුණු පාඨමාලා සඳහා ශ්‍රී ලංකා පොලිස් නිලධාරීන්ට පූර්ණ අරමුදල් සහිත පුහුණු ස්ථාන නිරන්තරයෙන් පිරිනමයි. 2024 ආරම්භයේ සිට, අපරාධ ස්ථාන කළමනාකරණය, කෘත්‍රිම බුද්ධිය සහ සයිබර් අපරාධ විමර්ශනය සහ ප්‍රභූ ආරක්ෂක පුහුණුව වැනි විවිධ විෂයයන් පිළිබඳ උසස් තත්ත්වයේ පුහුණු පාඨමාලා මගින් කනිෂ්ඨ, මධ්‍යම මට්ටමේ සහ ජ්‍යෙෂ්ඨ නිලධාරීන් ඇතුළු 60කට අධික පොලිස් නිලධාරීන් ප්‍රතිලාභ ලබා ඇත,” යනුවෙන් ද නිවේදනය වැඩිදුරටත් සඳහන් කළේය.

ඉන්දියානු තාක්ෂණික සහ ආර්ථික සහයෝගීතාව (ITEC) සහ ‘Aid to Sri Lanka’ වැඩසටහන යටතේ ඉන්දියානු රජය විසින් පාඨමාලා පිරිනමනු ලැබේ.

මේ වසරේ ශ්‍රී ලංකාවේ පොලිස් නිලධාරීන් 130කට වැඩි පිරිසකට ඉන්දියාවේදී පුහුණුව ලබාදීමට අපේක්ෂා කෙරේ.